Իրանի հարցով ԱՄՆ-ի հատուկ ներկայացուցիչ Բրայան Հուքը հայտարարել է, որ Եվրոպան պետք է ընտրություն կատարի Իրանի կամ ԱՄՆ-ի հետ համագործակցությունը շարունակելու համար, հաղորդում է WP-ը:
Բրայան Հուքի մեկնաբանությունը հնչել է այն ֆոնին, որ եվրոպական երկրները ջանքեր են գործադրում ձեռնարկել բոլոր միջոցները Իրանի կողմից 2015 թվականի միջուկային գործարքի պայմանները խախտելու փորձերը թույլ չտալու համար:
Եվրոպան ամեն կերպ փորձում է գտնել մեխանիզմը, որով կհամոզի Իրանին շարունակել մասնակցել համաձայնագրի շրջանակներում, քանի որ Թեհրանը հայտարարում է, որ ԱՄՆ-ի պատժամիջոցները նշանակում են, որ ինքը շահույթ չի ստանա համաձայնագրից:
Եթե Instex անունով հայտնի եվրոպական հատուկ ֆինանսական մեխանիզմը չկարողանա բավարարել Իրանի պահանջները միջուկային գործարքի շրջանակներում, ապա Իրանը կձեռնարկի ավելի վճռական քայլեր, հայտարարել է Իրանի ԱԳՆ պաշտոնական ներկայացուցիչ Աբաս Մուսավին:
Անցած տարի նախագահ Թրամփը դուրս էր եկել իրանյան միջուկային համաձայնագրից: Նա բազմիցս դատապարտել է գործարքը, որը կնքվել էր Օբամայի վարչակազմի օրոք Իրանի եւ վեց համաշխարհային տերությունների միջեւ՝ անվանելով այն «փտած», եւ կրկին կիրառել է պատժամիջոցներ:
ԱՄՆ-ի ներկայացուցիչները նշել են, որ նրանք ցանկանում են, որ Իրանը կատարի միջուկային գործարքի պայմանները, անգամ եթե Միացյալ Նահանգները հրաժարվել են դրանից: «Մեր պատժամիջոցները Իրանին իրավունք չեն ընձեռում արագացնել իր միջուկային ծրագիրը»,- հայտարարել է Հուքը: «Իրանը երբեք չի կարողանա մոտենալ միջուկային ռումբին»:
Իրանի լրատվամիջոցները հաղորդել են, որ ԱԳ նախարար Մուհամեդ Ջավադ Զարիֆն նամակ է ուղարկել ԵՄ արտաքին քաղաքականության և անվտանգության հարցերով ներկայացուիչ Ֆեդերիկա Մոգերինիին, որում կոչ է արել գործարքի եվրոպական անդամներին կատարել իրենց պարտավորությունները համաձայնագրի շրջանակներում՝ նշելով, որ դրանից են կախված Իրանի հաջորդ քայլերը:
