ՀՀ կառավարությունը Զինված ուժերի կարիքների համար նախատեսված մի շարք գնումներ գաղտնիացրել է և դրանք ներառել Պաշտպանության նախարարության գնումների գաղտնի անվանացանկում: Կառավարության այս որոշման նախագիծը կառավարության հունիսի 27-ի նիստում ներկայացրել է Պաշտպանության փոխնախարար Գաբրիել Բալայանը:
«Առաջին լրատվական»-ի հետ զրույցում անդրադառնալով հարցին, թե ինչով է պայմանավորված այս քայլը, փոխնախարարը նշեց, որ այս քայլով փորձ է արվում հնարավորինս խուսափել խնդիրներից, որոնք կարող են առաջանալ իրականացվող աշխատանքների ժամանակ՝ կապված ապրանքացանկը հրապարակային ներկայացնելու հետ: Նրա խոսքով՝ մասնավորապես հակառակորդի համար կարող են հետաքրքիր տեղեկություններ ներկայացվել, ինչը հնարավորություն կընձեռի վերլուծական աշխատանք կատարելու դեպքում այնպիսի տեղեկություններ ստանալ, որոնք կարող են ազդել բանակի մարտունակության վրա. «Խոսքը միայն զենք զինամթերքին չի վերաբերում, կարող են որոշակի հաշվարկներով վերլուծություն անել և տեղեկություն ստանալ, թե թվակազմն ինչքան է և այլն»:
Պաշտպանության նախարարը հայտարարել է հարձակողական նոր սերնդի զինամթերք ձեռք բերելու մասին «Բանակ-2019»-ի շրջանակներում: Անդրադառնալով այս դիտարկմանը՝ Գ. Բալայանը նշեց, որ սա շարունակական գործընթաց է. «Պաշտպանության նախարարը մի քանի անգամ առիթ է ունեցել խոսելու այդ մասին, որոշակիորեն, ոչ ուղղակի մեր այդ մտադրությանն անդրադարձել է նաև վարչապետը: Մասնավորապես շեշտը դրվել է ոչ թե հին զինամթերքը նորոգելու, այլ նոր սպառազինություն, նոր տեխնոլոգիաներով կառավարվող ճշգրիտ և գերճշգրիտ զինատեսակներ ձեռք բերելու վրա: Պաշտպանության նախարարի հայտարարությունները ստորագրված պայմանագրերի մասին էին, այսինքն՝ բանակցություններն ընթացքի մեջ էին, մի քանի շաբաթ առաջ Հայաստանում էր ՌԴ ներկայացուցչական պատվիրակություն, ձեռք բերված պայմանավորվածությունների իրականացման փուլ ենք մտել արդեն: Վերջին 1 տարվա ընթացքում նոր տեսակի սպառազինություն է ձեռք բերվել, և դա շարունակական գործընթաց է»:
Փոխնախարարի հավաստմամբ՝ գնումների և սպառազինությունների ձեռքբերումների գործընթացը ոչ թե պայմանավորված է սահմանի լարվածությամբ, այլ ԶՈւ զարգացման պլանին համապատասխան: «Լարվածությունը ստիպում է ավելի զգոն լինել»,-նշեց Գ. Բալայանը:
Մանրամասն՝ տեսանյութում:
