Հայաստանում շարունակվում է Սահմանադրական «երկվությունը», որը սկսվեց ՍԴ դատավոր ընտրված Վահե Գրիգորյանի հայտնի հայտարարությունից կամ նոր Սահմանադրության նրա հայտնի մեկնաբանությունից: Գրիգորյանն այդ հիմքով հայտարարեց, որ ՍԴ-ն ունի երկու դատավոր, որից մեկն այստեղ չէ եւ ինքը ստանձնում է դատարանի նախագահի պարտականությունը:
Գրիգորյանի այդ հայտարարությունն առաջացրեց բուռն քննարկում եւ մեկնաբանություններ: Նրան քաղաքականապես համակրող անձինք Գրիգորյանի հայտարարությունն ընդունեցին մեծ ոգեւորությամբ: Նախկին իշխող համակարգի համակիրներ, նաև այլ մասնագետներ, որոնք չեն պատկանում քաղաքական այս կամ այն դիրքին, Գրիգորյանի մեկնաբանությունը գնահատեցին ոտնձգություն իրավագիտության եւ սահմանադրագիտության դեմ:
Իրավիճակը կանգ է առել այդ «երկվության» ռեժիմում, որը շատերը գնահատում են Սահմանադրական ճգնաժամ: Այդպե՞ս է արդյոք: Թեմայի շուրջ «Առաջին լրատվական»- ի հետ քննարկմանը մասնակցեցին կրոնագետ Վարդան Խաչատրյանը, քաղաքագետ Գոռ Մադոյանը և Գերագույն խորհրդի նախկին պատգամավոր Ազատ Արշակյանը:
«Իրավունքի հետ կապված ցանկացած մեկնաբանություն, որը միանշանակորեն չի ընկալվում, այսպես ասած, ինքնագործունեության դրևորում է, որը, իհարկե, «երկվության» կբերի»,- նշեց Վ. Խաչատրյանը՝ հավելելով, որ իրավիճակը հանդարտված է, և հասարակական լիցքավորման աստիճանը այնպիսին չէ, որ քաղաքական ճնշման հնարավորություններ պարունակի:
«Հեղափոխական վիճակ է. հեղկոմի որոշումները սահմանադրական որոշումներ են. հեղկոմն ինչ որոշի, դա էլ կլինի Սահմանադրություն: ՍԴ դատավորներն ու անդամները պետք է որոշում կայացնեն և ներկայացնեն հասարակությանը: Դրսից ճնշում կա, ասում են՝ հեղափոխության դեմ հանկարծ չխոսեք, հանկարծ ձեզ հակահեղափոխական չհայտարարեք: Լավ կլինի, որ Հռոմի պապի ընտրության նման մի բան անի մեր հասարակությունը. Սահմանադրական դատարանի անդամներին ու դատավորներին պետք է փակել շենքում և ստիպել, որ որոշում կայացնեն: Թող ՍԴ անդամները ՍԴ նախագահ ընտրեն իրենցից մեկին, դա կլինի թավշյա լուծում»,- ընդգծեց Ազատ Արշակյանը՝ հավելելով, որ նոր ՍԴ կձևավորվի, հեղափոխության իրավունքով կձևավորվի նաև նոր Սահմանադրություն:
«Մեր հեղափոխությունը գնում էր սահմանադրաիրավական ճանապարհով: Կա սահմանադրական ճգնաժամ, հեղափոխությունը ենթադրում է սահմանադրական ճգնաժամ: Սա բնական գործընթաց է՝ ՍԴ-ն նույնպես պետք է փոփոխվի հեղափոխությունից հետո: Ճգնաժամի հաղթահարումն ընթացքի մեջ է,- նշեց Գոռ Մադոյանը:- ՍԴ-ն դիմադրում է, իրենք իրենց կամքով չեն փոխվելու. ՍԴ-ն չունի քաղաքական և իրավական լեգիտիմություն: Գործադիր իշխանությունը պետք է «մարդասիրական միջանցք» առաջարկի ՍԴ անդամներին՝ մանդատները վայր դնելու համար, որի շնորհիվ հնարավոր կլինի խուսափել հետագայում հնարավոր զարգացումներից»:
Վարդան Խաչատրյանը հավելեց, որ անհրաժեշտ է ՍԴ կազմի փոփոխություններ, ինչը հասարակության մեջ կամրագրի, որ այդ ինստիտուտը անկախ է և արդարացի գործունեություն ծավալող:
Մանրամասն՝ տեսանյութում: