ՀՀ Ազգային ժողովի նախագահ Արարատ Միրզոյանի կողմից շրջանառության մեջ է դրվել «Կոռուպցիայի կանխարգելման հանձնաժողովի մասին» օրենքում փոփոխություններ և լրացումներ կատարելու մասին» ՀՀ օրենքի նախագիծը։ Հայաստանի ՔՀԿ-ների հակակոռուպցիոն կոալիցիան, սակայն նախօրեին հայտարարություն էր տարածել և նշել իր անհամաձայնությունները նախատեսվող փոփոխությունների հետ։
Իրավաբանների հայկական ասոցիացիայի նախագահ Կարեն Զադոյանի խոսքերով՝ նման կարևոր նախագծերը պետք է քննարկվեն քաղաքացիական հասարակության, մասնագիտացված կառույցների հետ, գործընթացը լինի ներառողական, մասնակցեն բոլոր դերակատարները։ «Բայց շատ զարմանալի կերպով այդ օրենքից վերցվում է մի կտոր և հրատապության կարգով, առանց մասնագիտական շրջանակների հետ քննարկելու, բերվում է ԱԺ։ Բնականաբար, մենք ունենք մեկ հնարավորություն, հայտարարությամբ մեր մտահոգությունները ներկայացնելը, որն արել ենք»,- ասաց Զադոյանը՝ հավելելով, որ հիմնական մտահոգությունները վերաբերվում են Կոռուպցիայի կանխարգելման հանձնաժողովի կազմավորման կարգի փոփոխություններին։ Նախկինում եղել է մրցութային կարգ, որը շատ ներառողական և մասնագիտացված էր, իսկ այս նախագծով առաջարկվում է, որ հանձնաժողովի անդամի թեկնածուներից 5-ից 3-ին առաջադրում է իշխող քաղաքական ուժը՝ 1-ը կառավարության կողմից և 2-ը՝ ԱԺ կառավարող խմբակցության կողմից։ Ավելին, եթե ԱԺ ընդդիմադիր խմբակցությունները չկարողանան համախոհությամբ ներկայացնել թեկնածու, այդ անդամին ևս առաջադրում է իշխող ուժը՝ ի դեմս ԱԺ կառավարող խմբակցության։ «Այս պարագայում այդ հանձնաժողովը չի կարող որակվել որպես անկախ հանձնաժողով։ Սա հետքայլ է, որի պարագայում հանձնաժողովի անկախության մասին երաշխիքները հօդս են ցնդում»,- ասաց Զադոյանը։
Նշենք, որ հունիսի 24-ին էլ վարչապետի որոշմամբ ընդունվել է հակակոռուպցիոն քաղաքականության խորհուրդ ստեղծելու որոշումը, որում ևս կարևոր փոփոխություններ են կատարվել։ Զադոյանն ասաց, որ այս երկու դեպքում էլ ուղղորդված գործընթաց է գնում ինչ-որ անձանց կամ կոնկրետ շահեր հետապնդող շրջանակների կողմից։
Առավել մանրամասն՝ տեսանյութում։