«Բացառապես անվտանգություն»,- «Առաջին լրատվական»-ի հետ զրույցում հակիրճ պատասխանեց Մարդկային զարգացման միջազգային կենտրոնի նախագահ Թևան Պողոսյանը մեր հարցին, թե՝ ի՞նչ ուղերձ հղեց Ստեփանակերտը պաշտոնական Երևանին՝ Արշավիր Ղարամյանին նշանակելով Անվտանգության խորհրդի քարտուղար:
Թևան Պողոսյանի խոսքով՝ Արշավիր Ղարամյանը փայլուն մասնագետ է, որը մեծ ներդրում ունի անվտանգության համակարգերում. «Արցախի ցանկացած որոշում պետք է նայել անվտանգության պրիզմայի միջով: Քաղաքական տեսակետից կարելի է այլ հեքիաթներ պատմել, բայց բուն իմաստը դա է»:
Քաղաքական գիտության Հայաստանի ասոցիացիայի գործադիր տնօրեն Բենիամին Պողոսյանն էլ ճիշտ չի համարում Հայաստանի ներքաղաքական զարգացումները, այդ թվում նաև՝ երկրորդ նախագահի հետ կապված, ուղղակիորեն կապել Արցախի խնդրի հետ: «Իմ խորին համոզմամբ՝ Հայաստանում ցանկացած իշխանություն Արցախի հարցում հստակ գիտակցում է՝ որոնք են խնդիրները, և որոնք են կարմիր գծերը»:
Ինչ վերաբերում է Ռոբերտ Քոչարյանի խափանման միջոցը փոխելու Արցախի նախագահների երաշխավորագրերին, Թևան Պողոսյանն ասաց. «ՀՀ վարչապետն ու Բակո Սահակյանը իրար հետ հեռախոսով խոսել էին: Աստված տա, որ սրանից հետո իրար հետ հեռախոսով խոսելիս անպարզ հարցեր չմնան»:
Շարունակելով իր միտքը՝ Բենիամին Պողոսյանն առաջարկեց անձնական հարաբերությունները կամ ներքաղաքական խնդիրները չտեղափոխել Արցախի հարցում Հայաստանի իշխանությունների քաղաքականություն կամ Հայաստանի ու Արցախի ղեկավարների միջև ինչ-որ տարաձայնություններ. «Չեմ կարծում, որ որևէ մեկը՝ թե՛ Հայաստանում, թե՛ Արցախում, պատրաստ լինի գնալ մեզ համար անընդունելի քայլերի»:
Հարցազրույցն ամբողջությամբ՝ տեսանյութում: