Բրիտանիայի Սուֆոլք կոմսության Բերի Սենթ Էդմունդս քաղաքից Բյանկա Փերլը վստահ է եղել, որ հիվանդ է քաղցկեղով: Իրականում նա պարզապես հղի է եղել՝ չնայած այն հանգամանքին, որ անցած տարի քիմիաթերապիայի կուրս էր անցել և վստահ էր, որ չի կարող մայրանալ:
Ինչպես հաղորդում է Daily Mail-ը, Բյանկայի մոտ կրծքագեղձի չարորակ ուռուցք էր հայտնաբերվել, երբ նա 27 տարեկան էր: Հիվանդությունը հաղթահարելու համար աղջիկը ստիպված էր մեկ տարվա բուժման կուրս անցնել:
Սակայն արդյունավետ բուժումից մեկ տարի անց Բյանկային նորից սկսել են տանջել սրտխառնոցը և թուլությունը:
«Ես ծանր ապրումներով նորից դիմեցի բժիշկների օգնությանը, կարծելով, որ հիվանդությունը վերադարձել է»,- պատմել է նա:
Բարեբախտաբար վատ ինքնազգացողության պատճառը բոլորովին այլ է եղել. պարզվել էր, որ նա հղի է:
Քիմիա և ռադիոթերապիայից առաջ նրան զգուշացել էին, որ բուժումը կարող է անպտղության հանգեցնել:
Բուժումից առաջ նա ամեն դեպքում արտամարմնային բեղմնավորման համար սառեցրել էր ձվաբջիջները, սակայն դրանք անհրաժեշտ չէին եղել, նա բնական ճանապարհով էր հղիացել:
Մի քանի ամիս անց լույս աշխարհ է եկել Բյանկայի որդին, ընդ որում կեսարյան հատումը Բյանկային արել էին նույն վիրահատարանում, որտեղ և հեռացրել էին կուրծքը:
