ԱՄՆ-ը Իրանի դեմ պատժամիջոցները կչեղարկի հիրավի համապարփակ գործարքի կնքման դեպքում, որը կներառի միջուկային ու հրթիռային խնդիրները, ինչպես նաև մարդու իրավունքները: Այդ մասին հունիսի 24-ին Բրյուսելում կայացած հեռախոսային բրիֆինգում հայտարարել է Իրանի խնդրով ԱՄՆ հատուկ ներկայացուցիչ Բրայան Հուքը՝ հաղորդում է TASS-ը:
«Նոր գործարքը պետք է լինի իրոք համապարփակ, ներառի միջուկային հիմնախնդրի, բալիստիկ հրթիռների խնդրի, մարդու իրավունքների և տարածաշրջանում Թեհրանի գործունեության խնդրի լուծումները: Միայն նման գործարքի կնքումից հետո ԱՄՆ-ը լիովին կչեղարկի պատժամիջոցները և կվերականգնի դիվանագիտական հարաբերությունները»,-հայտարարել է նա:
Բացի այդ, Հուքի խոսքով՝ ԱՄՆ-ը հունիսի 24-ին կհորդորի ՄԱԿ-ի Անվտանգության խորհրդին՝ հասնել Իրանից Հորմուզի նեղուցում նավագնացության ազատության ապահովման՝ սկսելով Իրանի վրա առավելագույն դիվանագիտական ճնշում գործադրելու արշավը: ԱՄՆ նախագահ Դոնալդ Թրամփը հայտարարել է, որ իր երկիրը տնտեսապես շահագրգռված չէ Հորմուզի նեղուցում նավագնացության անվտանգությունը պահպանելու հարցում, որով համաշխարհային շուկա է փոխադրվում մերձավորարևելյան նավթի մեծ մասը, քանի որ Միացյալ Նահանգներն ինքն է դարձել այդ հումքի խոշոր արտադրողը: Իր հերթին Իրանի նախագահ Հասան Ռուհանիի խորհրդական Հեսամոդին Աշնան հունիսի 24-ին Twitter-ում գրել է, որ իր երկիրը պատրաստ չէ ԱՄՆ-ի հետ բանակցություններ վարել պատժամիջոցների ռեժիմի պահպանման պայմաններում:
