«Հիմնականում ինչի մասին խոսվում է հանրային լայն դիսկուրսում, առնչվում է սահմանահատումների տարբերությանը։ Սահմանահատումների տարբերություն ասելով նկատի ունենք մուտքերի և ելքերի տարբերությունը։ Այդ հաշվարկը Հայաստանում վարվում է 2000-ականների սկզբից, և այն դրական տարբերություն արձանագրել էր 2004-06 թվականներին՝ հիմնականում պայմանավորված Հայաստանում տնտեսական ակտիվությամբ։ Դրանից հետո, մինչև 2018 թվականը, մենք մշտապես կայուն բացասական ցուցանիշ ենք ունեցել։ 2018 թվականին, վերջին 12 տարիների ընթացքում առաջին անգամ մենք արձանագրեցինք դրական ցուցանիշ՝ մուտքերի և ելքերի տարբերությունը կազմեց +15313։ Այս ցուցանիշը, ուզում եմ, որ հասկանաք՝ դա անձ չէ, դա մուտքի և ելքի տարբերությունն է։ Շատ կարևոր է, որ մենք այս ցուցանիշի մեջ կարողանում ենք առանձնացնել Հայաստանի քաղաքացիներին և ոչ քաղաքացիներին։ Եթե 2017 թվականին Հայաստանի քաղաքացիների անձնագրերում մուտքի և ելքի տարբերությունը շուրջ -36000-ի կարգի էր, ապա 2018 թվականին այն կազմել է -4500»,- «Առաջին լրատվական»-ի հետ զրույցում ասաց ՀՀ ՏԿԶՆ միգրացիոն ծառայության պետ Արմեն Ղազարյանը։
«Քանի որ մենք ունենք սեզոնայնության գործոն, ապա ճիշտ է, որպեսզի այս ցուցանիշի գնահատումն անենք տարեկան կտրվածքով։ Սակայն նշեմ, որ 2019 թվականի առաջին եռամսյակի պատկերը հետևյալն է․ ընդհանուրը մոտ -3000-ի կարգի է, բայց Հայաստանի քաղաքացիների առումով ունենք դրական ցուցանիշ՝ մոտավորապես +2500։ Եռամսյակի կտրվածքով այս ցուցանիշը վերջին ինը տարիների մասով առաջին անգամ դրական է։ Ի՞նչի մասին է սա վկայում։ Սա, ընդհանուր առմամբ, վկայում է միգրացիոն ֆոնի բարելավման և դրական սպասումների մասին»,- հավելեց Արմեն Ղազարյանը։
Մանրամասները՝ տեսանյութում։