«Սա ընդամենը խիստ ակնթարթային գնահատական է»,- այսօր ասուլիսում ՀՀ ֆինանսների նախարար Վաչե Գաբրիելյանն այսպես բնորոշեց «Ֆորբսի» վատագույն երկրների ցուցակի 2-րդ հորիզոնականում Հայաստանի հայտնվելը:
Ըստ նրա՝ դա հիմնված է վերջին 3 տարիների մի շարք ցուցանիշների վրա՝ տնտեսական աճ, գնաճ, ընթացիկ հաշվեկշռի դեֆիցիտ, որոնք ՀՀ պարագայում վատթարացել են հատկապես 2009 թ. ճգնաժամային տարում: Նախարարի կարծիքով, այս ցուցանիշները միջինացված են 3 տարվա կտրվածքով, ինչը լավագույնս չի բնութագրում երկրի տնտեսական զարգացման ընթացքը: Վ. Գաբրիելյանը շեշտեց, թե Հայաստանի խնդիրները պայմանավորված են ճգնաժամով. տնտեսության 15% անկումն արդյունք էր փոխանցումների կրճատման հետևանքով շինարարական բումի նվազման:
«Եթե հաջորդ տարի այդ ցուցանիշը հաշվենք, լիովին այլ պատկեր կլինի՝ կունենանք նվազող գնաճ, տնտեսական աճ»,- նշեց Վ.Գաբրիելյանը՝ հավելելով, որ վարկանիշային մյուս կազմակերպությունների գնահատականները չեն նվազել:
Համաշխարհային բանկի Երևանի գրասենյակի ղեկավար Ժան Միշել Հապիի գնահատականով, Հայաստանի տնտեսությունն այդքան վատը չէ և բոլոր տնտեսությունների մեջ վատթարագույնը չէ: Նա փաստեց, որ, իհարկե, տեղի է ունեցել գնաճ, Հայաստանի ներմուծումը եղել է 2 ագամ ավելի, քան՝ արտահանումը, սղաճը երբեմն երկնիշ ցուցանիշ է եղել, բայց համաձայնեց, որ «Ֆորբսի» գնահատականն «ակնթարթային է»: Ժ.Մ.Հապիի կարծիքով, այս տարի հնարավոր կլինի իջեցնել սղաճը և մյուս բացասական երևույթները, և ՀՀ ԿԲ-ի նախատեսած 6.5% տարեկան սղաճը ՀԲ-ն համարում է իրատեսական: Նա հայտնեց, որ Հայաստանում իրականացված ինստիտուցիոնալ բարեփոխումների և քաղաքականությունների որակը ՀԲ-ն անցած տարի 77 երկրների շարքում գնահատել է որպես 2-րդ: