Առողջապահության նախկին նախարար, ԲՀԿ քաղխորհրդի արդեն նախկին անդամ Հարություն Քուշկյանի նշանակումը ԼՂՀ առողջապահության նախարարի պաշտոնում որոշակի փակագծեր բացեց: Քանի որ առանց Սերժ Սարգսյանի հետ համաձայնեցնելու այդ նշանակումը հնարավոր չէր լինի, ՀՀԿ մամուլի խոսնակ, ԱԺ փոխնախագահ Էդուարդ Շարմազանովից «Առաջին լրատվական»-ը հետաքրքրվեց` նշանակո՞ւմ է, որ ՀՀԿ-ն որոշակի մտավախություն ունի չորս ուժերի կոնսոլիդացիայի հետ կապված ԲՀԿ նախաձեռնողականությունից և փորձում է այդպիսով սիրաշահել ԲՀԿ-ին` նրա անդամներին պաշտոններ տալով` թեկուզ Ղարաբաղում: Ի պատասխան ՀՀԿ խոսնակը հայտարարեց. «Նախ, ԼՂՀ նախարարները նշանակվում են ԼՂՀ օրենսդրության և Սահմանադրության համապատասխան` նախագահի և վարչապետի որոշումներով, և դա չպետք է կապել Հայաստանի իշխանությունների հետ, երկրորդ` ՀՀ իշխանությունը և ՀՀԿ-ն երբեք գործարքների չեն գնում»: Իրո՞ք` հարցրեցինք մենք: «Այո»,- պնդեց Էդուարդ Շարմազանովը` շարունակելով. «Եվ երրորդ` ինչ վերաբերում է այս քառյակի հանդիպումներին, սիրախաղին, մենք մեր կարծիքը ասել ենք` մենք դրական ենք վերաբերվում, ողջունում ենք, որ չորս քաղաքական ուժերը համախմբման փորձ են կատարում: Միգուցե վաղը դառնան մեկ խմբակցություն, մեկ կուսակցություն: Աշխարհը գնում է կուսակցությունների խոշորացման ճանապարհով: Որևէ խնդիր չկա: Ինչ վերաբերում է մտավախությանը, ապա մտավախությունը քաղաքական կատեգորիա չէ, երկրորդ` մեզ չի մտահոգում մի բան, որը մենք դրական ենք գնահատում»:
ՀՀԿ-ն ինչպե՞ս է վերաբերվում այս նշանակմանը` հարցին ի պատասխան ՀՀԿ խոսնակն ասաց. «Հանրապետական կուսակցությունը չի միջամտում անկախ Արցախի ներքին որոշումներին»: Նրա խոսքերով` ՀՀԿ ԳՄ-ն նման հարց չի քննարկել: «Երեկ տեղի է ունեցել ՀՀԿ գործադիր մարմնի նիստ, և մեր օրակարգում նման հարց չի եղել: ԼՂՀ առողջապահության նախարարի նշանակման հարց մեր կուսակցության ԳՄ նիստում չի քննարկվել և չի էլ կարող քննարկվել»: Հետաքրքրվեցինք, թե Սերժ Սարգսյանը վերջերս հանդիպում ունեցե՞լ Հարություն Քուշկյանի հետ: «Հավանաբար հանդիպել է, մարտի ութին նախագահը այցելել է սպարապետի մայրիկին, և որքան լրատվամիջոցներից գիտեմ, Հարություն Քուշկյանն էլ է այնտեղ եղել»,- ասաց Շարմազանովը:
Քաղաքական չորս ուժերը` ԲՀԿ-ն, ՀՅԴ-ն «Ժառանգությունն» ու ՀԱԿ-ը առաջիկայում պատրաստվում են անդրադառնալ վարչապետի հրաժարականի պահանջին: ՀՀԿ խոսնակից հետաքրքրվեցինք, թե ինչպիսին կլինի ՀՀԿ դիրքորոշումը, եթե այդ ուժերը համաձայնության գան նաև Սերժ Սարգսյանի հրաժարականի շուրջ և որոշեն որոշակի կոնսոլիդացիա ստեղծել: Ըստ Շարմազանովի` «ֆանտաստիկայի ժանրից է», որ այդ ուժերը Սերժ Սարգսյանի հրաժարականը պահանջեն: «Որովհետև երեկ թե՛ ՀՅԴ-ից Աղվան Վարդանյանը, թե՛ ԲՀԿ-ից Ստեփան Մարգարյանը հայտարարեցին, որ իրենց օրակարգում նման հարց չկա»,- բացատրեց ՀՀԿ խոսնակը: Ասել է թե` ՀՀԿ-ում վստահ եք, որ ԲՀԿ-ն ու ՀՅԴ-ն նման պահանջ չեն էլ ունենալո՞ւ` հարցրեցինք մենք: «Գոնե ես նման կարծիքներ լսել եմ: Երկրորդ` ԲՀԿ-ից բացի այն, որ իրենք չեն կարող լինել ընդդիմություն, ես դեռևս այլ, դրան հակասող հայտարարություն չեմ լսել»,- պնդեց Շարմազանովը:
Մյուս կողմից` այսօր ԲՀԿ-ի հետ հանդիպումներ ունեցող, նրա հետ «ճանապարհային քարտեզ» քննարկող ընդդիմադիր ուժերը հնարավոր է որոշակի տարակուսանք ունենան: ԲՀԿ պատգամավոր, ԲՀԿ քաղխորհրդի անդամ Ստեփան Մարգարյանին հարցրեցինք, թե մտավախություն չունի՞, որ այն ընդդիմադիր ուժերը, որոնց հետ ԲՀԿ-ն հանդիպումներ է ունենում, խոսում է «ճանապարհային քարտեզների» մասին, հնարավոր է մտածեն, որ ԲՀԿ-ն իշխանության հետ համաձայնության է գալիս, քանի որ այդ նշանակումը թերևս հնարավոր չէր լինի առանց Սերժ Սարգսյանի համաձայնության: «Կարծում եմ, որ որևէ խնդիր չենք ունենա մեր գործընկերների հետ, որովհետև Ղարաբաղում աշխատելը չեմ կարծում, որ որևէ մեկի համար իշխանությունների հետ համագործակցել կընկալվի, որովհետև Քուշկյանը լավ մասնագետ է, գնացել է Ղարաբաղ աշխատելու, և դրան պետք է միայն դրական վերաբերվել: Ես չեմ կարծում, որ դա այն հարցն էր, որ պետք է ՀՀԿ-ի հետ համաձայնեցվեր, չգիտեմ ինչ արվեր: Բոլոր դեպքերում, ես գտնում եմ` Ղարաբաղ գնալը, Ղարաբաղում աշխատելը գովելի է որակյալ մասնագետի համար»:
Մեր հարցին` կարծում է իրենց գործընկեր կուսակցությունները կհավատա՞ն, որ առանց Սերժ Սարգսյանի հետ համաձայնության հնարավոր էր նման նշանակում, ԲՀԿ-ականն ասաց. «Ես վստահ եմ, որ դա որևէ խնդիր չի առաջացնելու մեր գործընկերների մոտ: …Ես չեմ կարող մտնել այն հարաբերությունների մեջ, ինչ որ ունի ԼՂՀ նախագահը ՀՀ նախագահի հետ: Ես չեմ կարծում, որ պետք է մտնել, որովհետև դա ոչինչ չի փոխում: Ես կարծում եմ` կարևոր է մեր համար, որ մեր գործընկերները դրան որևէ վատ ձևով չեն վերաբերվի: Ես վստահ եմ»:
Քանի որ Գագիկ Ծառուկյանի հետ համաձայնեցված է եղել Հարություն Քուշկյանի այդ քայլը, ԲՀԿ-ականից հետաքրքրվեցինք` հնարավո՞ր է ԲՀԿ մյուս նախկին նախարարները ևս դուրս գան կուսակցությունից և գնան, Ղարաբաղում պաշտոններ զբաղեցնեն, օրինակ` Վարդան Օսկանյանը դառնա ԼՂ ԱԳ նախարար: «Չեմ կարծում, որովհետև Վարդան Օսկանյանը շատ կարևոր և պատասխանատու աշխատանք է կատարում` չլինելով նախարար նույնիսկ, այնպես որ` Վարդան Օսկանյանի դեպքը բացառում եմ: Իսկ ընդհանրապես` եթե որևէ մեկը կարող է Ղարաբաղում օգուտ տալ, ես միայն կողմ եմ դրան, թող գնա»,- ի պատասխան ասաց Մարգարյանը:
Հիշեցնենք, որ մոտ 1.5 տարի առաջ դաշնակցական Արթուր Աղաբեկյանը նշանակվեց փոխվարչապետ ԼՂՀ կառավարությունում: Սա է, թերևս, նաև պատճառը, որ ՀՅԴ-ն ու ԲՀԿ-ն չեն կարող պահանջել Սերժ Սարգսյանի հրաժարականը:
