Ընդդիմադիր Հայ ազգային կոնգրես խմբակցության քարտուղար Արամ Մանուկյանը «Առաջին լրատվական»-ի հետ զրույցում «հիմարություն» որակեց Վլադիմիր Ժիրինովսկու երեկվա հայտարարությունը:
Հիշեցնենք, որ վերջինս ասել էր, թե Հայաստանն ու Ադրբեջանը Ղարաբաղի հարցում երբեք համաձայնության չեն գա, և որ պետք է Ղարաբաղն էլ, Ղրիմի օրինակով, մտնի Ռուսաստանի կազմի մեջ:
Նրանից հետաքրքրվեցինք նաև, թե իր կարծիքով՝ ինչո՞ւ Հայաստանի իշխանությունները մինչ այժմ չեն ճանաչել Ուկրաինայի նոր իշխանություններին. «Ես կարծում եմ՝ շտապել պետք չէ: Ընդհանրապես՝ երբ գործընթացներ են գնում, և մասնավորապես՝ երբ հայեր կան երկու կողմերում էլ՝ նկատի ունեմ և՛ Ղրիմում, և՛ Ուկրաինայում, հայկական իշխանությունները և հայկական քաղաքական ուժերը պետք է զգույշ լինեն և չշտապեն եզրակացություն անել: Սա քաղաքական կարևոր կանոն է»:
Մեր այն դիտարկմանը՝ արդյոք դա միջազգային ասպարեզում չի՞ ընկալվի որպես հայկական կողմի վախ ռուսական իշխանություններից, Արամ Մանուկյանն ասաց. «Դուք ուզում եք, որ ես մեղավորնե՞ր գտնեմ, ես կրկնում եմ՝ պետք է զգույշ մնալ քաղաքական գործընթացներից, հայտարարություններից , երբ այնտեղ գործընթացներ են գնում: Երբ 150.000 հայ Ղրիմում կա, մի 250.000 էլ՝ Ուկրաինայում, պետք է զգույշ լինել և սպասել ու տեսնել, թե ինչ է լինում»։
Մանրամասները՝ տեսանյութում:
