Այսօր` մարտի 14-ին, Գյումրու քաղաքապետ Սամվել Բալասանյանի գլխավորությամբ տեղի է ունեցել հերթական բաց խորհրդակցությունը՝ նվիրված քաղաքում ջրամատակարարման նոր ցանցի անցկացման աշխատանքների հետևանքով թաղային նշանակության փողոցներում ստեղծված վիճակին:
Խորհրդակցությանը մասնակցել են «Հայջրմուղկոյուղի» ՓԲԸ ներդրումային ծրագրերի տնօրեն Նորիկ Գևորգյանը, ջրամատակարարման նոր ցանց անցկացնող` «Դարոժնիկ» և «Սադե» շինարարական ընկերությունների պատասխանատուներ, քաղաքապետարանի բնակկոմունալ բաժնի աշխատակիցներ:
Բացման խոսքում քաղաքապետը նշել է, որ ջրամատակարարման ցանցի անցկացման հետևանքով թաղային նշանակության փողոցներում ստեղծված վիճակը շարունակում է դժգոհության տեղիք տալ բնակչության շրջանում և դա է պատճառը, որ անհհրաժեշտ է մշակել հստակ ժամանակացույց, որպեսզի շինարարական կազմակերպությունները կարողանան գոնե նորմալ վիճակի բերել նշյալ փողոցները, ինչից հետո նոր շարունակեն մնացած փողոցների փորման աշխատանքները:
Սամվել Բալասանյանը շինարարական կազմակերպություններին առաջարկել է նաև հարկ եղած դեպքում դիմել քաղաքապետարանին համապատասխան տեխնիկական օժանդակության ստանալու համար, ինչպես նաև հանձնարարեց բնակկոմունալ բաժնին հնարավորինս կարճ ժամկետում մաքրել քաղաքային նշանակության փողոցներն առկա ցեխի և փոշու շերտից, քանի դեռ եղանակային պայմանները բարենպաստ են:
Պատասխան խոսքում ստեղծված վիճակից դուրս գալու և աշխատանքների կազմակերպման իրենց առաջարկներն ու ծրագրերը ներկայացրել են նաև «Հայջրմուղկոյուղի» ՓԲԸ ի և շինարարական կազմակերպությունների ներկայացուցիչները:
Հաջորդ հանդիպումը տեղի կունենա մարտի վերջին, որի ժամանակ քաղաքապետին կներկայացվի փողոցների մաքրման աշխատանքների ամփոփ հաշվետվությունը:
