Լուրեր
Կան ուժեր, որոնց ձեռնտու է, որ ՀՀ-ում քաոսային վիճակ լինի․ որտեղից է ուղղորդվում հիբրիդային պատերազմը
  • 18:50
  • 2019-06-11
  • Դիտումներ՝ *

«Հայաստանում նոր չէ, որ հիբրիդային պատերազմ է վարվում, և ընդհանրապես այդ երևույթը նոր չէ հետխորհրդային երկրներում»,- «Առաջին լրատվական»-ի հետ զրույցում նկատեց քաղաքագետ Ստեփան Սաֆարյանը:

Նրա խոսքով՝ 21-րդ դարում պատերազմներ վարելու եղանակները փոխվել են: «Այժմ տնտեսական, քարոզչական և այլ նպատակներով են հասնում առաջադրված խնդիրների լուծմանը: Հայաստանում դա տեսանելի էր հատկապես ֆորս-մաժորային շրջաններում: Այժմ էլ այդ ֆենոմենը կա»,- նշեց Ստեփան Սաֆարյանը և ընդգծեց, որ ինքը ստորագրում է Նիկոլ Փաշինյանի բոլոր դիտարկումների տակ:

«Հայաստանում հիբրիդային պատերազմի բոլոր էլեմենտները առկա են, և ակնհայտ է, այսպես կոչված, անուղղակի հարձակման ստրատեգիան: Կան ուժեր, որոնց ձեռնտու է, որ Հայաստանում քաոսային իրավիճակ լինի՝ պատրանք ստեղծելով, որ Հայաստանում իշխանությունները թույլ են»,- ասաց քաղաքագետը:

Դիտարկմանը՝ արդյո՞ք հիբրիդային պատերազմի կրակը փչում է հյուսիսից, միջազգայնագետ Սուրեն Սարգսյանը «Առաջին լրատվական»-ի հետ զրույցում նկատեց. «Ընդհանրապես համաշխարհային գործընթացները այսօր ամբողջությամբ ուղեկցվում են հիբրիդային պատերազմով: Իսկ հիբրիդային պատերազմը, որ մեզ է պարտադրված Ադրբեջանի կողմից, կարծում եմ՝ նորմալ գործընթաց է՝ հաշվի առնելով հայ-ադրբեջանական հարաբերությունները»:

Ինչ վերաբերում է հայ-ռուսական հարաբերություններին, միջազգայնագետը նկատեց՝ այդ հարաբերություններում այնքան խնդիր չկա, որքան խոսում են դրանց մասին. «Աշխատանքային խնդիրներ միշտ էլ եղել են ու կլինեն, բայց ինչ-որ անդառնալի պրոբլեմներ ես անձամբ չեմ նկատում»:

 

Հարցազրույցն ամբողջությամբ՝ տեսանյութում:

  • Դիտումներ՝ *