«Բարգավաճ Հայաստան» կուսակցությունն արդեն «Ժառանգություն» կուսակցությանն ուղարկել է հանդիպման հրավերը: Այդ մասին այսօր մեզ հետ զրույցում ասաց ԲՀԿ խմբակցության պատգամավոր Վահե Հովհաննիսյանը: Նա ավելացրեց, թե հրավերն ուղղվել է կուսակցության նախագահ Րաֆֆի Հովհաննիսյանին և նրա ընտրած պատվիրակությանը: Իսկ ԲՀԿ-ի մեկ այլ պատգամավոր՝ Ստեփան Մարգարյանն էլ ավելացրեց, թե նախնական պայմանավորվածությամբ «Ժառանգության» հետ հանդիպումը տեղի կունենա վաղը, իսկ ժամը դեռ հաստատված չէ:
«Ժառանգության» հետ հանդիպումով, փաստորեն, հանդիպումների առաջին շրջանն ավարտվելու է: Այս հանդիպումներից հետո հաջորդ քայլը ո՞րն է լինելու: «Հետո լինելու են այլ հանդիպումներ արտախորհրդարանական ուժերի հետ, հասարակության տարբեր խմբերի, քաղաքացիական հասարակության ներկայացուցիչների հետ»,- ասաց Վ. Հովհաննիսյանը: Իսկ այդ հանդիպումների արդյունքում ի՞նչ ակնկալիքներ ունի ԲՀԿ-ն: «Վերջնական արդյունքում Հայաստանը դառնալու է ուժեղ, զարգացող երկիր»,- այսպիսի փիլիսոփայական պատասխան տվեց նա:
ԱԺ «Ժառանգություն» խմբակցության ղեկավար Ռուբիկ Հակոբյանն էլ իր հերթին ավելացրեց, թե բանավոր հրավեր է եղել, այն փոխանցվել է Ր. Հովհաննիսյանին, և որ իրենք կհանդիպեն: Առաջիկա այդ հանդիպման մասին մի քանի հարց ուղղեցինք Ռ. Հակոբյանին:
– Րաֆֆի Հովհաննիսյանի հետ քննարկե՞լ եք այդ հրավերը, նա հակվա՞ծ է մասնակցել այդ հանդիպմանը:
– Առաջիկայում կխոսենք այդ մասին, բայց կարծում եմ, Րաֆֆի Հովհաննիսյանին ճանաչողները գիտեն, որ ինքը հանդիպումներին և քննարկումներին միշտ կողմ է եղել:
– Հանդիպման ժամանակ ի՞նչ օրակարգ եք ներկայացնելու քննարկումների համար:
– Անշուշտ, օրակարգեր կլինեն և մեր կողմից, ենթադրում եմ` նաև ԲՀԿ-ի կողմից: Բոլոր դեպքերում ընդհանուր ձևակերպումը հետևյալն է` հանրապետությունում ստեղծված իրավիճակի քննարկում:
– Իսկ դա ենթադրո՞ւմ է նախագահի, կառավարության հրաժարականի պահանջ:
– Ես ոչինչ չեմ ասի: Ասում եմ` ընդհանուր օրակարգը սա է, և այնտեղ արդեն դետալացված կխոսենք:
– Այնուամենայնիվ, «Ժառանգությունը» նախատեսո՞ւմ է նախագահի հրաժարականի պահանջ ներկայացնել:
– Ինձ միշտ մի բան է մտահոգում՝ ինչո՞ւ է այս ամբողջ լրատվական դաշտն ուզում անպայման այնպես անել, որ այս հանդիպումը, այս համագործակցությունը չկայանա: Այն, ինչ տեսնում եմ մեկնաբանություններում և հարցադրումներում` դա եմ հասկանում: «Ժառանգությունը», Ր. Հովհաննիսյանը ասել են, և ես իմ հերթին ասել եմ, որ առկա համակարգը հակահամակարգ է, թույլ չի տալիս պետություն ստեղծել, պետականություն զարգացնել: Նրանք, ովքեր դեմ են, որ այս համակարգը փոխվի, նրանք, ովքեր դեմ են, որ նորմալ պետություն ունենանք, պետք է համակարգի հետ հեռացվեն քաղաքական դաշտից:
– Համակարգի վերևում Սերժ Սարգսյանն է: Նրա հրաժարականի հարցը բարձրացնելո՞ւ եք:
– Սերժ Սարգսյանն ինքը կարող է նախաձեռնել այս ամեն ինչը: Պետք է պատրաստ լինել նաև արմատական փոփոխությունների, պետք է այդքան ինքնասիրահարված կեցվածքով չգնալ ապահով Հայաստան կառուցելու: Իրենք համառորեն երկու ոտքը մի կոշիկի մեջ են դրել և ասում են, թե մենք ապահով Հայաստան ենք կառուցելու: Ժողովրդի մեծամասնությունը, մենք ասում ենք, որ սա անապահով Հայաստան տանող ճանապարհ է, իրենք շարունակում են իրենց քաղաքականությունները: «Ժառանգությունը» միշտ ասել է և կրկնում է, այս համակարգը պետք է փոխվի: Իրենք դե՞մ են, որ փոխվի, ուրեմն իրենք պետք է հեռանան իշխանությունից:
– Իսկ կառավարությանն անվստահություն հայտնելու քննարկումները վեսկսելո՞ւ եք:
– Հիմա նիստերի մեջ ենք, առաջիկայում կունենանք հանդիպումներ, եթե չեմ սխալվում վաղն է նշանակված այդ հանդիպումը: Ասել եմ և կրկնում եմ` կառավարության հրաժարականի հարցը ինքնանպատակ չպետք է լինի: Կառավարության հրաժարականը պետք է հաջորդի այն բանին, երբ ունես այլընտրանք և պետք է առաջարկես: Մենք ասում ենք, որ այս կառավարությունը չի կարողանում իրականացնել իր լիազորությունները` թե՛ քաղաքական, թե՛ գործադիր առումով, և հանրապետությունն այս վիճակում է հայտնվել: Բնականաբար, եթե մենք անվստահության հարց ենք դնում, պետք է նաև ասենք, թե ինչպես ենք պատկերացնում կառավարության գործունեությունը: Ինչ կառավարություն ենք ակնկալում, որպեսզի կարողանա թե՛ քաղաքական, թե՛ տնտեսական առումով պետությունը դուրս բերել այս վիճակից: Առանց այս ծրագիրն ունենալու կառավարության հրաժարականի պահանջը ինքնանպատակ է դառնում: Եվ այսօր այս քաղաքական ուժերն աշխատում են այդ պլատֆորմը ձևավորելու վրա:
