ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարազդատ Կարապետյանն «Առաջին լրատվական»-ի հետ զրույցում անդրադառնալով հարցին, թե դատական համակարգում առկա ճգնաժամի և ներդրումային միջավայրի միջև արդյո՞ք կա կապ, նշեց. «Կապ, իհարկե, կա, քանի որ դատական համակարգը սեփականության ինստիտուտը պաշտպանող հիմնական համակարգն է, այսինքն, որպեսզի ներդրողն իրեն պաշտպանված զգա, պետք է ունենալ անկախ դատական համակարգ: Չենք կարող ասել, թե ներդրողները սպասում են, որ երբ Հայաստանում դատական համակարգը բարելավվի, կգան Հայաստան, բայց բոլորն էլ գիտակցում են, որ անկախ դատական համակարգը սեփականության երաշխավորն է»:
Վ. Կարապետյանը հույս հայտնեց, որ հնարավոր է՝ ինքնամաքրման ընթացակարգերով բարելավվի դատական համակարգը:
«Դատական համակարգում դեռևս չենք տեսնում ցանկալի արդյունք, բայց ներդրումների առումով պատկերը փոփոխված է արդեն,- վստահեցրեց պատգամավորը: -Տնտեսության ակտիվության գործակիցը ապրիլին աճ է գրանցել՝ ավելի քան 9 տոկոս: Վստահ եմ, որ այս տարի երկնիշ աճ ենք ունենալու, անկախ բյուջեում հոռետեսական պլանավորումից»:
ԱԺ-ում այսօր առաջին ընթերցմամբ ընդունվել է Հարկային օրենսգրքում փոփոխություններ և լրացումներ կատարելու մասին օրենքների փաթեթը 2-րդ ընթերցմամբ և ամբողջությամբ ընդունելու մասին հարցը: Վ. Կարապետյանի խոսքով՝ Հարկային օրենսգրքի առանցքային և արմատական փոփոխություններ են արվում: «Պետք է սպասենք, մինչև աշխատանքը դառնա արժեք ստեղծող հիմնական գործոնը, և այդ դեպքում կմտածենք պրոգրեսիվ հարկման մասին: Հիմա աշխատանքի հարկերը կրճատելու և արդեն կուտակված հարստությունը հարկելու ճանապարհով ենք շարժվում: Մենք սպառում ենք բարիքներ և չարիքներ: Ակցիզային հարկերը ուղղված են չարիքի (ալկոհոլի, ծխախոտի, խաղատների…) հարկմանը»,- նշեց պատգամավորը:
«Բոլոր գործարարները, որոնք հաստատվել են Վրաստանում, կվերադառնան Հայաստան, որովհետև բոլոր այն առավելությունները, որ ունի վրացական համակարգը, շուտով կունենանք նաև մենք, միաժամանակ չենք ունենա այն մինուսները, որ առկա է այնտեղ»,- վստահեցրեց մեր զրուցակիցը:
Անդրադառնալով իշխանության կադրային խնդիրներին, Վ. Կարապետյանն ընդգծեց, որ կադրային խնդիրներն առկա են միջին օղակում. այն ամողջությամբ պետք է փոխել:
Մանրամասն՝ տեսանյութում:
