Երեկ Ազգային ժողովում 2018 թվականի բյուջեի կատարողականը ներկայացնելիս ԱԱԾ տնօրեն Արթուր Վանեցյանը անդրադարձել է ԱԱԾ գործառույթներին։ «ԱԱԾ մարմինների գործունեությունն ապահովվում է հետևյալ հիմնական ուղղություններով՝ հետախուզություն, հակահետախուզություն, սահմանադրական կարգի և ահաբեկչության դեմ պայքար, պետական սահմանի պահպանում, տնտեսական անվտանգության և կոռուպցիայի հակազդում և այլ ուղղություններում»,-նշել է ԱԱԾ տնօրենը՝ հավելելով, որ ԱԱԾ գործունեությունը ընդգրկում է ՀՀ կենսագործունեության բոլոր ոլորտներն ու բնագավառները: «Այն ներառում է ՀՀ պաշտպանվածության ամրապնդումը, անվտանգության ապահովումը, պետական սահմանների անձեռնմխելիությունը, տարածքային ամբողջականության անձեռնմխելիությունը, ինչպես նաև օտարերկրյա պետությունների հատուկ ծառայությունների և կազմակերպությունների առանձին անձանց հետախուզական և այլ քայքայիչ գործունեության բացահայտումը, կանխումն ու խափանումը»,-նշել էր ԱԱԾ տնօրենը:
ԱԱԾ գործառույթների թվարկումից հետո իրավապաշտպանները կրկին հարց են բարձրացնում՝ եթե սրանք են ԱԱԾ հիմնական գործառույթները, ապա ինչու է հատկապես հեղափոխությունից հետո ԱԱԾ-ն իր ուսերին վերցրել կոռուպցիայի դեմ պայքարով զբաղվելու ծանր գործը, այդ մասով քրեական գործեր է հարուցում, քննություն է կատարում։
Իրավապաշտպան Արթուր Սաքունցի խոսքերով՝ ԱԱԾ-ն առհասարակ չպետք է քննչական գործառույթ իրականացնի։ «Մենք, այո, մշտապես բարձրաձայնել ենք, որ ԱԱԾ-ն չպետք է զբաղվի կոռուպցիոն հանցագործությունների քննությամբ, որովհետև դա ռիսկային է։ Նման գործերի քննությամբ պետք է զբաղվի Հատուկ քննչական ծառայությունը։ Իրավական տեսանկյունից էլ անհասկանալի է, թե ինչու որոշ պաշտոնատար անձանց վերաբերյալ գործերի նախաքննությամբ զբաղվում է ՀՔԾ-ն, իսկ որոշ դեպքերում՝ ԱԱԾ-ն»,- «Առաջին լրատվական»-ի հետ զրույցում ասաց իրավապաշտպանը՝ հավելելով, որ այս ամենը մի բան է հուշում և հիմնավորում, որ ինստիտուցիոնալ լուրջ փոփոխություններ պետք է կատարվեն, և նախորդ իշխանության օրոք ձևավորված ինստիտուցիոնալ վիճակը պետք է փոխվի, քանի որ այն նոր իշխանության պայմաններում մշտապես հարցեր է առաջացնելու քաղաքական կամքի ապահովման տեսանկյունից։ «Արմատական բարեփոխումները՝ ինստիտուցիոնալ, օրենսդրական, առավել քան կենսական անհրաժեշտություն են, որպեսզի հասարակության շրջանում վստահությունը իրավապահ մարմինների նկատմամբ վերականգնվի, և կասկածներ չառաջանան։ Սա չի վերաբերում միայն ԱԱԾ-ին։ Բայց մի բան հստակ է, որ ԱԱԾ-ն պետք է զբաղվի նրանով, ինչի համար ստեղծված է՝ հետախուզություն և հակահետախուզություն։ Իսկ գործերի քննությունը չպետք է լինի ԱԱԾ տիրույթում»,- ընդգծեց Արթուր Սաքունցը։
«Իրազեկ քաղաքացիների միավորում» ՀԿ նախագահ Դանիել Իոաննիսյանը ևս համակարծիք է, որ օր առաջ պետք է փոխվեն ԱԱԾ լիազորությունները, դրանք բերվեն ժողովրդավարական հասարակության տրամաբանության մեջ տեղավորվող լիազորությունների. «ԱԱԾ-ն պետք է զբաղվի հետախուզությամբ, հակահետախուզությամբ՝ մնալով փակ կառույց և պարտադիր էլ չի, որ դառնա նախարարություն։ ԱԱԾ-ից, միանշանակ, քննչական ֆունկցիաները պետք է փոխանցվեն Քննչական կոմիտեին, ինչպես նախատեսված էր 2014 թվականին, բայց չարվեց։ ԱԱԾ սահմանապահ ֆունկցիաները պետք է փոխանցվեն ներքին գործերի նախարարությանը, որը, հուսով եմ, դեռ կստեղծվի։ ԱԱԾ-ն որևէ հակակոռուպցիոն ֆունկցիա չպետք է ունենա։ Դրանք պետք է փոխանցվեն հակակոռուպցիոն մարմնին։ Կրկնում եմ՝ ԱԱԾ-ն պետք է զբաղվի ոչ այլ ինչով, քան հետախուզությամբ և հակահետախուզությամբ»,- ընդգծեց Իոաննիսյանը։
Լուսանկարը՝ Armeniasputnik-ի
