Տրանսպորտի և կապի նախարար Գագիկ Բեգլարյանը մարտի 12-ին ԱԺ- Կառավարություն հարցուպատասխանի ժամանակ անդրադարձավ Հյուսիս-Հարավ մայրուղու շինաշխատանքներին: Բեգլարյանը նախ զարմանքով նկատեց, որ ստվեր է նետվում այդ կարևորագույն աշխատանքի, այդ ծրագրի իրականացման վրա, ապա նշեց, որ ուրախ է՝ դահլիճում տեսնել ԲՀԿ-ական պատգամավոր Վահե Էնֆիաջյանին, ով կտեղեկանա կատարված աշխատանքների մասին:
Բեգլարյանը նշեց, որ բոլոր հարցերի պատասխանները կարելի էր ստանալ ընդամենը մեկ զանգի միջոցով, մինչդեռ ներկայում իրենք ստիպված են պատասխանել բազմաթիվ անհանգիստ քաղաքացիների և փարատել նրանց մտահոգությունները: Մայրուղու կառուցման աշխատանքներն, ըստ նախարարի, աշխատանքները լավ են ընթանում, դրանք որակով կազմակերպվում են: Նախարարի խոսքով՝ հակառակ տարածվող տեղեկություններին՝ Հյուսիս-Հարավում ամեն ինչ նորմալ է ընթանում, աշխատանքները շատ որակով կազմակերպվում են:
«Նախորդ անգամ հայտարարվեց, որ հինգ տարի ձգձվում են այդ աշխատանքները, ուզում եմ հիշեցնել՝ աշխատանքները սկսվել են 2012 թվականի սեպտեմբերի 13-ին, հարց՝ իսկ ուշացում հինգ տարի կա՞: Այո, ուշացում կա, բայց ոչ թե հինգ տարի, այլ հինգ ամիս: Հինգ ամիս ուշացման պատճառները երեքն են. Տեխնիկական՝ մեքենաների ներկրումը ուշացավ մի քանի ամիս, երկրորդը՝ նախարարության և Կառավարության կողմից որակի պահանջն էր, որ մենք ստացանք, երրորդը՝ իսպանական կողմը՝ շինարարները, ցանկանալով ունենալ ավելի մեծ եկամուտներ, ուզում էին ցեմենտը ներկրել Հայաստան, որովհետև մեր ցեմենտն ավելի թանկ է, քան ներկրածը»,- ասաց նա:
Բեգլարյանը տեղեկացրեց, որ Կառավարության բանակցությունների շնորհիվ ցեմենտը գնվում է Հայաստանից, և անհանգստանալու կարիք չկա. մարտի 17-ից նորից կսկսի ցեմենտը վաճառվել, և դա նրա համար է, որ մոտ հազար հինգ հարյուր մարդ, որ աշխատում են Արարատցեմենտ գործարանում, շարունակեն աշխատել:
Մանրամասները՝ տեսանյութում:
