Հայկական կողմը բազմիցս շեշտադրել է ԼՂՀ խաղաղ պայմանագրի կնքման պատրաստակամության մասին, մինչդեռ Ադրբեջանը նոր-նոր է հայտարարում այդ մասին: Այսօր տեղի ունեցած մամուլի ասուլիսի ժամանակ ասաց քաղաքագետ Ալեքսանդր Մարկարովը` շեշտելով, որ միջազգային հանրությունը գիտի` հակամարտող կողմերից որն է իրապես շահագրգիռ խաղաղության պայմանագրի կնքմամբ:
«Հնարավոր մեծ փաստաթուղթ ստորագրելուց առաջ Ադրբեջանը հնչեցնում է նախապայմաններ, որոնք հայկական կողմի համար անընդունելի են, այն է` դուրս բերել զինված ուժերը «օկուպացված» տարածքներից: Ստացվում է, որ դեռևս պայմանագիր չեղած՝ կան նախապայմաններ»,- ասաց նա:
Անդրադառնալով ուկրաինական նոր իշխանություններին՝ քաղաքապետը նշեց, որ թեպետ նրանք սահմանադրական չեն, սակայն լեգիտիմ են: «Խոսելով Վիկտոր Յանուկովիչի` երեկ տեղի ունեցած մամուլի ասուլիսի մասին, աասեմ, որ դրա արդյունքում մեկ անգամ համոզվեցինք, որ Ուկրաինայի նախկին նախագահն այլևս ոչնչի համար պատասխանատու չէ: ինչ վերաբերում է այդ երկրի պոտենցիալ ապագային, ապա այնտեղ կատարվող ամեն ինչ չէ, որ միանշանակորեն պետք է ընդունել: Ակնհայտ է, որ Ուկրաինայում պետք է վարել հանգիստ քաղաքականություն»,- ասաց Ալեքսանդր Մարկարովը:
Պատասխանելով Ուկրաինայի հարցով Ռուսաստան-Արևմուտք առճակատման մասին հարցին՝ քաղաքագետն ասաց, որ այն միշտ է լինելու: «Եթե հույս ունենք, որ Ղրիմի ինքնորոշումը հանգեցնելու է ԼՂՀ խնդրի նախադեպային լուծմանը, ապա ես սրան սկեպտիկորեն եմ վերաբերվում: Ղրիմի ինքնորոշումը ընդամենը բերելու է մասամբ ճանաչված պետության գոյության»,- ասաց նա:
Լուսանկարը` PanARMENIAN Photo-ի
