Իրավախախտ կամ ոստիկանության ուշադրության կենտրոնում հայտնված անչափահասների հետ աշխատող համայնքային վերականգնողական կենտրոնները 2014 թ. հունվարից այլևս չեն գործում միջազգային ֆինանսավորումն ավարտվելու պատճառով, իսկ Հայաստանում պրոբացիոն ծառայության ստեղծումը, որը նաև այս ոլորտը պետք է ընդգրկի, ձգձգվում է:
Այսօր «Մեդիա» կենտրոնում «Անչափահաս իրավախախտներ. վերականգնողական կենտրոնների փակման խնդիրը» թեմայով քննարկմանը Հայ օգնության ֆոնդի երեխաների աջակցության կենտրոնի գործադիր տնօրեն Միրա Անտոնյանը նշեց, այս կենտրոնում իրենք գործ էին ունենում ոչ միայն այն երեխաների հետ, որոնք հաշվառված չեն, այլ նաև այն երեխաների հետ, ովքեր դեռ հաշվառված չէին ոստիկանությունում, բայց դպրոցներից ստացված արձագանքներից հետո նաև այդ երիտասարդների հետ:
«Երեք տարվա ընթացքում 250 երեխայի հետ ենք աշխատել, ավելի քան 700 երեխայի հետ իրականացվել են ինտերակտիվ ուսուցման դասընթացներ դպրոցներում, մոտավորապես 1000 երեխա շահեց այս ծրագրից»,- նշեց նա:
Նրա խոսքով՝ սոցիալական աջակցության ծառայությունը դեռևս զարգացած չէ:
Նա նշեց, որ հաշվառված երեխաների հետ աշխատանքը 95 տոկոս արդյունավետություն է արձանագրել: Այս կենտրոնների փորձը նաև հնարավորություն է տալիս հասկանալ՝ դեռահասին ինչն է դրդել հակասոցիալական վարք դրսևորելուն, և ինչու է նա հայտվել այդ վիճակում:
«Փորձում ենք հասկանալ, օգտակար լինել, և մեծ է հավանականությունը, որ հետագայում այդ արարքը չի կրկնվի, քանի որ ներքինի հետ գործ ունենք, փոխում ենք հայացքը աշխարհի նկատմամբ»,- հավելեց նա:
«Փի-Էյչ Ինթերնեշնլ» կազմակերպության հայկական գրասենյակի ղեկավար Մարիամ Մարտիրոսյանը նշեց, որ կենտրոնը փորձում է աշխատանքը չդադարեցնել: Նա նաև ասաց, որ յուրաքանչյուր երեխայի հետ աշխատում են երեք ամիս:
ՀՀ ոստիկանության 3-րդ վարչության պետի տեղակալ Արթուր Վարդանյանն ասաց, Աբովյանի վերականգնողական կենտրոնի ճակատագիրն այս պահին քննարկման ընթացքում է: Նա նշեց, որ փորձում են ամեն ինչ անել, որ հնարավոր լինի կենտրոնի գործարկումը:
Նա նաև հավելեց, որ այս առումով դրական արդյունքներ կան. երրորդ վարչության պետը հանդիպումներ է ունենում, քննարկումներ են իրականացնում այս կենտրոնի վերաբացման իրականացման հարցում:
Իրավախախտ անչափահասների հետ, Արթուր Վարդանյանի խոսքով, անկախ կենտրոնների առկայությանը, գործող օրենսդրության համաձայն, ոստիկանությունն իր աշխատանքներն իրականացնում է, բայց այլ է արդյունավետության գործակիցը:
Իսկ թե ով պետք է կենտրոնների գործարկման հետ կապված որոշում կայացնի՝ ՀՀ արդարադատության նախարարի տեղակալ Արամ Օրբելյանը նշեց, որ տարբեր գերատեսչությունների գործառույթները կանխորոշված են, արդարադատության նախարարությունը ունի բավականին լայն գործառույթներ, նախարարությունը շարունակում է աշխատել, որ կանխարգելման գործընթացները ինտնեսիվ ընթանան: Իսկ թե որ գերատեսչության բյուջեով կֆինանսավորվի՝ պարզ կլինի հետագայում բյուջեի բաշխման ժամանակ:
Ըստ նրա՝ հարուստ երկիր չլինելն է մեզ ստիպում, որ պրոբացիոն ծառայությունն այս խնդրով չզբաղվի:
