ԱԺ արտաքին հարաբերությունների մշտական հանձնաժողովի փոխնախագահ Հովհաննես Իգիթյանը «Առաջին լրատվական»-ի հետ զրույցում անդրադառնալով դիտարկմանը, որ ԵԱՏՄ վերջին նիստը բավականին ինտրիգային եղավ, նշեց. «Ենթադրում եմ, որ նկատի ունեք այն, որ հայաստանյան լրատվամիջոցներում շպրտվում են լուրեր, որոնց հետևանքով ինտրիգ է ստեղծվում՝ Փաշինյանը Պուտինի հետ հանդիպեց-չհանդիպեց, շքանշան ստացավ-չստացավ, բայց ինձ, ինչպես նաև շատերին՝ հասարակությանը, քաղաքական ուժերին հետաքրքրում է, թե ինչ է քննարկում ԵԱՏՄ-ն, ուր է գնում, արդյոք Հայաստանին հաջողվում է իրականացնել այն թեզը, որ միշտ հնչում է՝ ԵԱՏՄ-ն շուկա է, որտեղ 170մլն մասնակից կա:
Պուտինի հետ վարչապետը չպետք է հանդիպեր: Նախկին իշխանություններն անընդհատ ուզում են ցույց տալ, որ Ն. Փաշինյանը չի ընդունվում ԵԱՏՄ անդամ երկրների երկար իշխող ղեկավարների կողմից: Սխալվում են, եթե մտածում են, որ Սերժ Սարգսյանը նրանց կողմից ընդունվում էր որպես հավասար, ո՛չ, Ս. Սարգսյանը ընդունվում էր որպես Ռուսաստանին քծնող մարդ: Եվ նախորդ նիստերում Հայաստանը ոչ մի հարց չէր բարձրացնում, լուռ նստած էր անկյունում:
Հայաստանն այժմ կարողացավ ԵԱՏՄ-ում բերել կոլեկտիվ քննարկումներ: Մինչ այդ երկրների ղեկավարներն առանձին հանդիպում էին Պուտինի հետ և քննարկում հարցերը: Այսօր արդեն ԵԱՏՄ-ում են հարցեր բարձրաձայնում, որպես ԵԱՏՄ լիարժեք անդամ, և քննարկում է ծավալվում, փորձ է արվում խնդրին համակարգային լուծում տալ»:
Իգիթյանի կարծիքով՝ Հայաստանում վեթինգ վաղ թե ուշ պետք է լիներ. «Վեթինգի գործիքին իշխանությունը պետք է ավելի վաղ դիմեր: Վերջապես կառավարությունը ձևավորվել է և պատրաստ է վեթինգ իրականացնել օրինական ճանապարհով, այդ խնդիրը կարող էր լուծվել նաև հեղափոխական ճանապարհով՝ ժողովրդի պահանջով»:
Հարցին, թե արդյոք խնդիրներ են առաջացել Հայաստանի և Արցախի քաղաքական իշխանությունների միջև, Հովհաննես Իգիթյանը պատասխանեց. «Ես Հայաստանի և Արցախի քաղաքական իշխանությունների միջև չեմ տեսնում խնդիր, բայց Արցախի ղեկավարությունն անլուրջ քայլ է արել: Նրանց քայլը վնասում է թե՛ Արցախի Հանրապետության վարկանիշին միջազգային կառույցներում, թե՛ Լեռնային Ղարաբաղի հիմնահարցի լուծմանը: Ա. Ղուկասյանի և Բ. Սահակյանի քայլը համարում եմ զուտ անձնական հարաբերություններից բխող քայլ՝ իրենց ընկերոջը փորձել են օգնել: Բայց անձնական հարցի համար վնասել գլոբալը՝ հայ ազգին, պետությանը, ԼՂ հարցի լուծմանը, կասկածի տակ դնել ամեն ինչը, ես անընդունելի եմ համարում»:
Մանրամասն՝ տեսանյութում:
