ԱՄՆ նախագահ Բարաք Օբաման և փոխնախագահ Ջո Բայդենը բանակցություններ են անցկացրել Ղազախստանի, Իսպանիայի և Կիպրոսի առաջնորդների հետ Ուկրաինայում տիրող իրավիճակի վերաբերյալ՝ հաստատելով այդ երկրում խնդրի խաղաղ կարգավորման հարցում շահագրգռվածությունը: Այս մասին հայտնում է Business Standard-ը:
Օբաման Ղազախստանի նախագահ Նուրսուլթան Նազարբաևի հետ զրույցում կոչ է արել ակտիվ դեր խաղալ Ուկրաինայի խնդրի խաղաղ լուծման որոնման գործում:
«Առաջնորդները հաստատել են Ռուսաստանի և Ուկրաինայի միջև վեճի խաղաղ լուծում գտնելու հարցում ընդհանուր հետաքրքրվածությունը: Նրանք համակարծիք են, որ կարևոր է ինքնիշխանության և տարածքային ամբողջականության սկզբունքներին աջակցելը»,- նշվում է հաղորդագրությունում:
Օբաման ուկրաինական իրադարձությունների շուրջ զրուցել է նաև Իսպանիայի վարչապետ Մարիանո Ռախոյի հետ:
ԱՄՆ փոխնախագահ Ջո Բայդենը Կիպրոսի առաջնորդ Նիկոս Անաստասիադիսի հետ քննարկել է տարածաշրջանային հարցեր՝ ներառյալ իրավիճակն Ուկրաինայում:
«Երկու առաջնորդները հաստատել են Ուկրաինայի ինքնիշխանության և տարածքային ամբողջականության հարցում կոշտ աջակցությունը նրա միջազգայնորեն ճանաչված սահմաններով և խորհրդակցել քայլերի վերաբերյալ, որոնք կարող են հանգեցնել իրավիճակի լիցքաթափման և դրա խաղաղ լուծման»,- ասվում է հաղորդագրությունում:
