Հայկական սոցիոլոգիական ասոցիացիայի նախագահ Գևորգ Պողոսյանը, «Առաջին լրատվական»-ի հետ զրույցում անդրադառնալով Մարտի 1-ին Լևոն Տեր-Պետրոսյանի ելույթի ուղերձներին, նշեց, որ առաջին նախագահն առաջին անգամ ամբիոնից հնչեցրեց ոչ թե իշխանափոխության, այլ կոնկրետ մարդու՝ Սերժ Սարգսյանի հրաժարականի հարցը:
Լևոն Տեր-Պետրոսյանն առաջին անգամ անդրադարձավ ընդդիմության հետ համատեղ գործունեությանը՝ նշելով, որ ՀԱԿ-ը համաձայն է ցանկացած ֆորմատով գործել ընդդիմադիր ուժերի հետ. «Չլինելով կառավարության անդամ՝ Տեր-Պետրոսյանն ասաց, որ մտադրություն էլ չունեն կառավարության մաս կազմել, և առաջին անգամ քաղաքացիական հասարակության ակտիվության գործոնը լուրջ ձևով ընդգծեց, որովհետև քաղաքացիական սեկտորի ակտիվությունը շատ ավելի հեռանկարային է, քան մեր ընդդիմադրր կուսակցություններինը, որոնցից բոլորն արդեն հոգնել են»:
Ինչ վերաբերում է Գագիկ Ծառուկյան – Իվանիշվիլի համեմատությանը, ապա մեր զրուցակցի կարծիքով՝ դա նշանակաում է հեղաշրջում՝ առանց ողբերգության, առանց արյունի, Մայդանի. «Իմ կարիքով՝ այստեղ մի խնդիր կա. Իվանիշվիլին Վրաստան եկավ դրսից, օլիգարխ, ներսում գործող բիզնեսմեն չէր՝ ի տարբերություն Ծառուկյանի, որը միշտ Հայաստանում է եղել, միահյուսված է մեր տնտեսության և՛ բարիքներին, և՛ չարիքներին: Այ եթե դրսից մեկ ուրիշ հայ գար, այդ մոդելը կգործեր, բայց Ծառուկյանն այդ մոդելը չէ»:
Մեր զրուցակիցն այն կարծիքին է, որ Տեր-Պետրոսյանի ելույթը հիասթափության ալիք չի բարձրացնի, որովհետև այն վերլուծական էր, բավական ճշգրիտ էին տարվում զուգահեռները:
Խոսելով ԵՄ-ՄՄ անդամակցությունից, Գևորգ Պողոսյանն ասաց, որ թե՛ ՀԱԿ-ը, թե՛ Լևոն Տեր-Պետրոսյանը այս հարցի առնչությամբ նախկինում ասել էին, որ սա թեև պարտադիր, բայց ճիշտ քայլ է, սակայն իրավիճակը դարձավ վտանգավոր ուկրաինական իրադարձություններից հետո. «Եթե Ուկրաինան ՄՄ-ին չմիանա, ապա ՄՄ-ի բուն էությունն ու հեռանկարները շատ ու շատ կնվազեն, Մաքսային միությունը իմաստը կկորցնի, և մեր էնտեղ լինելը շատ լուրջ հարվածի տակ կդրվի»:
Նրա համոզմամբ՝ ցույցերն ու բողոքի ակցիաները տարբեր երկրներում յուրովի են լինում: Հայաստանում այժմ շատ մեծ է բողոքողների թիվը, իրավիճակը պայթյունավտանգ է, բայց Մարտի 1 չի լինի, մարդիկ կսահմանափակվեն հանրահավաքներով, զանգվածային գործողություններով:
