Грузия Online-ի փոխանցմամբ՝ իրավաբանական հարցերով խորհրդարանական կոմիտեի նախագահ Պավլե Կուբիաշվիլին երեկ այցելել է պատրիարքարան և քննարկել կրոնական միություններին իրավաբանական անձի կարգավիճակ շնորհելու հարցը։
Կուբիաշվիլին չի գաղտնազերծել բանակցությունների մանրամասները՝ հայտնելով միայն, որ պատրիարքարանը ցանկանում է նվազագույնի հասցնել այդ ամենը։ Կուբիաշվիլին մերժմամբ է պատասխանել՝ ընդգծելով, որ դա խտրական մոտեցում է։
Կուբիաշվիլին պատրիարքարանին իշխանությունների անունից հայտնել է, որ պետությունը պատրաստ է իր վրա վերցնել օտար պետություններում գտնվող վրացական տաճարների, վանքերի, եկեղեցական կառույցների ու դրանց փլատակների պաշտպանությունը։
Իշխանությունները պատրաստ են նաև բանակցություններ վարել այդ երկրների հետ՝ Վրացական Ուղղափառ եկեղեցուն կարգավիճակ շնորհելու վերաբերյալ։
Հիշեցնենք, որ կրոնական միություններին, այդ թվում՝ նաև Հայ Առաքելական եկեղեցուն իրավաբանական անձի կարգավիճակ շնորհելուն դեմ է արտահայտվել նաև Կովկասի հարցերով վրացի փորձագետ Մամուկա Արեշիձեն, որին հատկապես մտահոգում է խնդրի հայկական ուղղվածությունը։
