Ղրիմի անդամակցությունը Ռուսաստանին սպառնում է պարտիզանական պատերազմով: Ինչպես հաղորդում է Reuters գործակալությունը, այս մասին հայտարարել է Ուկրաինայի նախկին վարչապետ Յուլյա Տիմոշենկոն Գերմանիայի կանցլեր Անգելա Մերկելի հետ բանակցություններից հետո: Ուրբաթ ուշ երեկոյան Տիմոշենկոն ժամանել է Բեռլինի «Շարիտե» կլինիկա՝ նախատեսված վիրահատության համար:
Բանակցությունների ընթացքում Տիմոշենկոն Մերկելին կոչ է արել ուժեղացնել ճնշումը Ռուսաստանի վրա: Կանցլերի հետ հանդիպումից հետո Տիմոշենկոն գործակալությանը տված հարցազրույցի ժամանակ նշել է, որ դեռևս Ռուսաստանի նկատմամբ կիրառվող միջազգային միջոցները չեն տվել զգալի արդյունք, ինչը սպառնում է Ղրիմը վերածել թեժ կետի:
Տիմոշենկոյի խոսքերով՝ ինքը բանակցություններին ներկայացրել է Ռուսաստանի դեմ տնտեսական պատժամիջոցների իր նախագիծը, որը, ինչպես հույս ունի, համոզիչ կլինի Վլադիմիր Պուտինի համար: Քաղաքական գործիչը չի հստակեցրել պատժամիջոցների բնույթը:
Նա Արևմուտքին կոչ է արել թույլ չտալ անցկացնել Ղրիմն Ուկրաինայից տարանջատելու հարցով հանրաքվե:
«Դրա անհապաղ հետևանքը կլինի պարտիզանական պատերազմը: Սև ծովում կհայտնվի իսկական թեժ կետ… Եթե Պուտինին թույլ տանք օգտագործել այնպիսի ուժային կոմպոնենտներ, ինչպես Ղրիմում, ապա նա որտե՞ղ կանգ կառնի… Նա այնքան հեռու կգնա, որքան թույլ կտան» ,- հայտարարել է նա:
