Իտալիայի նախկին վարչապետ Սիլվիո Բեռլուսկոնին հերքել է տեղի ԶԼՄ-ներում տարածված տեղեկությունն այն մասին, որ ամռանը նա մտադիր է ամուսնանալ իր ներկայիս զուգընկերուհու՝ 28-ամյա Ֆրանչեսկա Պասկալեի հետ: Այս մասին հայտնում է RIA Novosti-ն:
«Ոչ, ես չափազանց ծեր եմ դրա համար»,- հինգշաբթի լրագրողներին հայտնել էր 77-ամյա քաղաքական գործիչը գրքի շնորհանդեսի ժամանակ, որի համար նա նախաբան է գրել:
Ավելի վաղ իտալական ԶԼՄ-ներում տեղեկություն էր հայտնվել, որ Բեռլուսկոնին և Պասկալեն կարող են ամուսնանալ հունիսին՝ երկրի հարավում: Մեդիամագնատի համար դա կլիներ երրորդ ամուսնությունը:
Նրանք միմյանց հետ են արդեն վաղուց: Զույգն իր նշանադրության մասին հայտնել էր 2011-ի սուրբծննդյան տոներին:
