Պարտադիր կուտակային կենսաթոշակային համակարգի դեմ պայքարող «Դեմ եմ» շարժումը մարտի 7-ին ֆինանսների նախարարության առջև բողոքի ակցիա կանցկացնի՝ «Հակազդենք ֆինանսների նախարարության ապօրինություններին» խորագրով: Այս մասին մարտի 5-ին լրագրողների հետ հանդիպմանը հայտնեց շարժման անդամ, քաղաքագետ Դավիթ Մանուկյանը:
«Այն, որ այսօր ֆինանսների նախարարության կողմից տոտալ ճնշումներ են իրականացվում, կարծում եմ՝ ոչ մեկի համար գաղտնիք չէ. բոլորս նույն երկրում ենք ապրում: Ի սկզբանե, երբ ՍԴ-ն որոշումը հրապարակեց, ՊԵԿ-ն ու ֆիննախը շարժվում էին նույն ուղով, հայտարարում էին՝ իբր, եթե օրենքը հետագայում սահմանադրական ճանաչվի, միանգամից երեք ամսվա գումար կպահեն: Այս ցեցը գցեցին, մտածեցին՝ պահել հաշիվները, որ հետագայում աշխատակիցներն այդ բեռը չզգան. սա ծուղակ էր: Հետո ասացին՝ եթե պահել ես, ինչո՞ւ չես փոխանցում. գոյություն ունի պատասխանատվություն պետության նկատմամբ:
Պատասխանատվությունը կատեգորիա է, որ նախատեսում է պատիժ, եթե պատիժը չկա, ես դա պատասխանատվություն չեմ համարում»,- ասաց նա՝ նկատելով, որ բոլոր իրավահարաբերությունները պետք է դիտարկել ՄԻ տեսանկյունից. դա գերակա շահ է և ենթադրում է աշխատակցի կարծիքը լսել:
Մանուկյանը համոզմունք հայտնեց՝ ամսի 7-ին պիտի համարժեք պատասխան տան: Նա կոչ արեց հանրությանը՝ բոլորով գնալ ու իրենց ձայնը բարձրացնել, ասել՝ բավ է, այլևս չենք ենթարկվելու:
Ակտիվիստ Հարութ Աղլամազյանը նշեց՝ քանի որ ֆիննախը կոնկրետ հեռուստաընկերություններով հանդես է եկել, ասել, որ եթե գումարներ չփոխանցվեն միջանկյալ կամրջային հաշիվներին, այդ դեպքում գործատուների նկատմամբ կկիրառվեն պատժամիջոցներ, ապա դա բացահայտ ճնշում է: «Մենք համաչափ պատասխան ենք տալու, որ նման հայտարարություններ չանեն: Իրենք իրավունք չունեն նման բան անելու. կարող են կիրառել վարչական տույժեր:
Քանի որ օրենքը վիճարկվում է ՍԴ-ում և ոչ մի պատասխանատվություն չի ենթադրում, հետևաբար դա օրենք չէ, նորմ է: Պետք չէ կատարել փոխանցում միջանկյալ հաշիվներին»,- ասաց նա:
Շարժման անդամ Մանուկ Զաքարյանի համոզմամբ՝ պետք է նշել՝ ֆինանսների նախարարը պարտավոր է հայտարարել (ու դա բնական է), որ այդ գումարները կարող են հետ ուղարկվել աշխատակիցներին, հակառակ դեպքում տրամաբանություն չկա, միևնույն է՝ այդ գումարները որևէ կերպ չեն աշխատելու:
Ակտիվիստը տեղեկացրեց, որ ճնշումներ կիրառվել են նաև կոնկրետ հիմնադրամների հետ կապված. Հայաստանը փոքր երկիր է, հնարավոր է դա իմանալ: Եթե հունվարի կեսին մի քանիսն էին ընտրել, ինչպե՞ս եղավ, որ փետրվարին նրանց թիվը կտրուկ աճեց:
Մանուկյանը նկատեց՝ այստեղ նույն պրակտիկան է, ինչ ընտրությունների ժամանակ: Քաղաքագետ-ակտիվիստը նշեց, որ գործատուն էլ է ճնշված, բայց միևնույն է՝ կա ինքնակազմակերպման խնդիրը, որ կոլեկտիվն ինքը պիտի անի, ինչպես ՀԱԷԿ դեպքում եղավ:
Արհմիությունները, որ կոչված են պաշտպանելու աշխատողների իրավունքները, կա՛մ չկան, կա՛մ հաճախ ձևական բնույթ են կրում: Շարժման ակտիվիստները նշում են՝ կոնֆլիկտը ոչ թե իրենց և գործատուների միջև է, այլ իրենց և կառավարության:
«Դեմ եմ» շարժման ակտիվիստները նաև մի կարևոր հանգամանք ընդգծեցին՝ կապված ամսի 28-ի հետ. հանրության մեջ այդ ամսաթիվը շատ է շոշափվում, հաճախ՝ ոչ ճիշտ, մինչդեռ մարտի 28-ին ընդամենը սկսվում է դատավարությունը, դեռ առաջին նիստն է լինելու, իսկ հանրության մեջ հաճախ թյուրըմբռնում կա:
Լուսանկարը` PAN Photo-ի
