Ուկրաինական դեպքերի զարգացումների մասին այսօր տեղի ունեցած քննարկման ժամանակ «Հրապարակ» թերթի գլխավոր խմբագիր Արմենե Օհանյանն այն կարծիքը հայտնեց, որ իշխանությունը այնքան էր հոգնեցրել հասարակությանը, հակաիշխանական տրամադրություններն այնքան մեծ թափ էին առել, որ դրա դեմն առնել հնարավոր չէր. «Oրեր առաջ, երբ դեպքերի կուլմինացիոն պահն էր, և ամբողջ համացանցը լցված էր Յանուկովիչի և իր շրջապատի կալվածքների մասին տեսանյութերով, ես թաքուն հույս ունեի, որ իշխանության մեջ գտնվող տարբեր անձինք ևս կնայեն ու կտեսնեն, որ այդ ուղտը կարող է մի օր իրենց դռանն էլ չոքել»:
Խոսելով մեր իշխանությունների մասին, Արմինե Օհանյանն ասաց, որ իշխանությունը եթե անգամ շատ դրական քայլեր ձեռնարկի, խիստ կասկածելի է, որ տրամաբանական ավարտին կհասցվեն դրանք, քանի որ հասարակության մեջ կա իշխանության ցանկացած քայլի նկատմամբ բոյկոտ:
Նրա կարծիքով՝ Ուկրաինայում ծավալվող դեպքերից ոչ միայն իշխանությունը, այլև հասարակությունը դասեր քաղելու անհրաժեշտություն ունի. «Նախևառաջ մեր հասարակությունը պետք է տեսնի, որ սատանան այնքան սարսափելի չէ, ինչքան իր մասին խոսում են: Իրականում 21-րդ դարը այն դարն է, որտեղ ոչ թե ֆիզիկական ուժից է պետք վախենալ, այլ հենց տնտեսական գործընթացներից, և այս գործընթացը ցույց է տալիս, որ Արևմուտքն ավելի մեծ լծակներ ունի, քան Ռուսաստանը»:
Արմինե Օհանյանն ասաց, որ պուտինյան Ռուսաստանն այն ուժը չունի, որ Արևմուտքի հետ առճակատման գնա, չի կարելի ամեն ինչ կապել Ռուսաստանի հետ, քանի որ այս երկիրն ունի միլիոնավոր դժվարություններ:
Ինչ վերաբերում է Մաքսային միության հետ Հայաստանի անդամակցությանը, ապա նրա խոսքով՝ այս ընտրությունը մեր կարճատեսության, ոչ հեռանկարային հաշվարկների հետ է կապված:
Մանրամասները դիտեք տեսանյութում:
