Մարտի 3-ին Լիբանանում Հայաստանի դեսպան Աշոտ Քոչարյանը հանդիպում է ունեցել Լիբանանի վարչապետ Թամամ Սալամի հետ:
Դեսպան Քոչարյանը Լիբանանի վարչապետին փոխանցել է ՀՀ վարչապետ Տիգրան Սարգսյանի ջերմ շնորհավորանքները նոր կառավարության կազմավորման կապակցությամբ:
Հանդիպման ընթացքում կողմերը քննարկել են հայ-լիբանանյան երկկողմ բարեկամական հարաբերությունների օրակարգի հարցերը, համագործակցության ընդլայնման հեռանկարները, մասնավորապես՝ առևտրատնտեսական և զբոսաշրջության ոլորտներում:
Երկուստեք բարձր գնահատելով երկու երկրների քաղաքական հարաբերությունների ներկա մակարդակը՝ դեսպան Քոչարյանը և Լիբանանի վարչապետը կարևորել են բարձրաստիճան պատվիրակությունների փոխայցելությունների շարունակականությունը, գործարար հանդիպումների և համաժողովների անցկացումը:
Կողմերն ընդգծել են լիբանանահայ համայնքի կառուցողական դերակատարությունը Լիբանանի զարգացման գործում: Հանդիպմանն անդրադարձ է եղել նաև Լիբանանի ներքաղաքական իրավիճակին:
