Հայաստանի ֆուտբոլի ֆեդերացիան՝ ի դեմս նախագահ Արթուր Վանեցյանի, հնարավորություն կտա մեր ազգային թիմի գլխավոր մարզիչ Արմեն Գյուլբուդաղյանցին դրական տեղաշարժեր անելու: Ավելին, Վանեցյանը հայտարարել է, որ պետք է համարձակություն ունենալ և ազգային հավաքականում հեղափոխություն իրականացնել՝ հնարավորություն տալով երիտասարդ ֆուտբոլիստներին: Ազգային հավաքականի վերջին անատամ ելույթներից հետո Արմեն Գյուլբուդաղյանցի հեռացումը դարձել է հասարակական պահանջ, բայց…
«Չեմ ուզում գնահատական տալ՝ օբյեկտիվ է, թե օբյեկտիվ չէ: Եթե ունենք պարտություններ, հասարակությունն իրավունք ունի դժգոհելու: Բայց կա նաև մի բան, որը պետք է հաշվի առնել. մարզիչը նշանակվել է ոչ հասարակ պայմաններում, մարզիչը նշանակվել է ոչ պլանավորված: Երբ ես ընտրվեցի ֆուտբոլի ֆեդերացիայի նախագահ, անսպասելի բոլորիս համար հրաժարականի դիմում ներկայացրեց նախկին գլխավոր մարզիչը: Արտասահմանցի մարզիչ հրավիրելու աշխատանքներ տարանք: Հայաստան ժամանեցին մի քանի անվանի, աշխարհահռչակ մարզիչներ: Ջանի դե Բիազին… չեմ ուզում անուններ ասել: Ցավոք սրտի, նրանք գալիս են, ծանոթանում են պոտենցիալին և հրաժարվում են: Այսինքն՝ ոչ թե ֆեդերացիան գումարներ է խնայել կամ այլ պատճառներ ունի, այլ մարզիչները գալիս են, ծանոթանում են և ասում, որ չենք կարող այս թիմում արդյունք ունենալ: Բայց դա չի նշանակում, որ մեր թիմը վատն է: Թող ոչ մեկը չմտածի, որ ես քննադատում եմ մեր թիմի խաղացողներին: Ուղղակի այդ մարդիկ չեն ճանաչում թիմը, չեն ուզում պոտենցիալը վերականգնել, ուզում են ավելի հեշտ ճանապարհ՝ գնալ այլ երկրներում զբաղվել իրենց մարզչական գործունեությամբ: Այսօր ունենք Արմեն Գյուլբուդաղյանց, որը ֆուտբոլի նվիրյալ է, որն այսօր փորձում է ամեն ինչ անել մեր հայկական ֆուտբոլի զարգացման համար: Եկեք տանք այդ շանսը: Որևէ կաշկանդվածություն չունենք ցանկացած պահի փոխելու Արմեն Գյուլբուդաղյանցին, բայց այդ պահը պետք է հասունանա: Կա՛մ կհասունանա նրան փոխելու պահը, և նա կփոխվի, կա՛մ նա ցույց կտա այնպիսի արդյունքներ, որոնք կգոհացնեն թե՛ ֆեդերացիային, թե՛ հասարակությանը»,- armtimes.am-ին տված հարցազրույցում ասել է ՀՖՖ նախագահը:
Վերջինիս նման հայտարարությունը կարելի է մեկնաբանել թերևս այսպես. բարձրակարգ մարզիչները չեն ցանկանում գլխավորել Հայաստանի հավաքականը, իսկ տեղացի կադրերից ամենահարմարը Գյուլբուդաղյանցն է, որը հայկական ֆուտբոլի մեծ նվիրյալ է և կարող է ինչ-որ բան փոխել: Վանեցյանի հետ կարելի է համաձայնել թերևս մեկ հարցում: Գյուլբուդաղյանցը իսկապես հայկական ֆուտբոլի մեծ նվիրյալ է և օժտված է կադրերի պատրաստման մեծ տաղանդով: Բայց եկեք ընդունենք, որ գլխավոր մարզչի, այսպես կոչված՝ թիմի մենեջերի աշխատանքը նրա մոտ այնքան էլ լավ չի ստացվում:
Գյուլբուդաղյանցի գրանցած արդյունքներին կրկին հարկ չենք համարում անդրադառնալ: Նշենք միայն, որ այն մարզիչը, որը ակումբային մակարդակով ոչ մի լուրջ արդյունք չի գրանցել, հավաքականում աշխատելու «իրավունք չունի»: Ի տարբերություն ակումբի՝ հավաքականում անհրաժեշտ է ընդամենը մի քանի օրում կառուցել խաղը: Իսկ Արթուր Վանեցյանն ասում է՝ եկեք մի քիչ էլ սպասենք, տեսնենք՝ ինչ կլինի: Եթե ստացվեց՝ Գյուլբուդաղյանցին կպահենք, եթե ոչ՝ կհեռացնենք: Այսինքն՝ ֆուտբոլի ֆեդերացիայում այդպես էլ չի վերացել այն կարծրատիպը, որ ազգային թիմը փորձադաշտ չէ: Դեռևս Ջիբրալթարի հետ հանդիպումից հետո պարզ էր, որ մարզչի նշանակումը ճիշտ չէր: Իսկ այն պնդումները, որ բարձրակարգ մարզիչները չեն ցանկանում աշխատել ազգային թիմում, չեն համապատասխանում իրականությանը:
«Առաջին լրատվական»-ի հավաստի աղբյուրների համաձայն՝ վերջերս «Ալաշկերտ» ֆուտբոլային ակումբը հանդես էր եկել բավական կառուցողական առաջարկով: Հիշեցնենք, որ ապրիլի սկզբին Երևանում էր հայտնի սերբ մասնագետ Սլավոլյուբ Մուսլինը: Եվ ահա «Ալաշկերտի» ղեկավարությունը ՀՖՖ-ին առաջարկել էր որ Մուսլինը միաժամանակ գլխավորի և ՀՀ ազգային հավաքականը, և երևանյան ակումբը՝ պատրաստակամություն հայտնելով վճարել աշխատավարձի կեսը: ՀՖՖ-ն մերժել էր «Ալաշկերտի» առաջարկը, ինչից հետո էլ Մուսլինը հեռացել էր Հայաստանից:
Ըստ էության ՀՖՖ-ն ատամներով պահում է Արմեն Գյուլբուդաղյանցին: Այն, որ հայկական ֆուտբոլում դրական տեղաշարժեր տեղի են ունենում, կարծում ենք՝ անհերքելի է: ՀՖՖ-ի կողմից կառուցողական քայլեր շարունակ արվում են, բայց ազգային թիմը շարունակում է մնալ մեր ցավոտ կողմը: Հնարավոր է ինչ-որ մեկի համոզմամբ՝ Գյուլբուդաղյանցը լավ մարզիչ է և կարող է արդյունք ապահովել, բայց արդյոք ինչ-որ մեկի համոզմունքը բավարա՞ր է ազգային թիմի ապագայի հետ խաղալու համար:
Առկա իրավիճակում գլխավոր մարզչի հարցի վերաբերյալ վերջնական որոշումը ՀՖՖ նախագահինն էր: Եվրոպայի առաջնության ընտրական փուլում անհաջող հանդիպումներից հետո Վանեցյանը կայացրեց իր որոշումը, հետևաբար Եվրո-2020-ի ընտրական փուլում մեր գլխավոր թիմի վերջնական արդյունքների ողջ պատասխանատվությունը ընկնելու է հենց ՀՖՖ նախագահի վրա: Վանեցյանը ուներ հնարավորություն Գյուլբուդաղյանցին փոխելու, բայց…
