Ապրիլի 28-ին ՀՀ տարածքային կառավարման և զարգացման նախարար Սուրեն Պապիկյանն աշխատանքային այցով մեկնել է Արարատի մարզ: Այս մասին տեղեկացնում են ՀՀ տարածքային կառավարման և զարգացման նախարարությունից: Համայնքներում առկա խնդիրների քննարկման նպատակով` նախարարը Արարատի մարզպետ Գարիկ Սարգսյանի ուղեկցությամբ, հանդիպումներ է ունեցել Ուրցաձոր, Արարատ, Այգավան, Վանաշեն, Եղեգնավան, Նարեկ, Այգեստան, Նորաշեն, Ռանչպար, Ղուկասավան, Նոր Խարբերդ, Հայանիստ համայնքների ղեկավարների հետ։
Նախարարն այնուհետև այցելել է մարզում գործող մի քանի ձկնաբուծարաններ, շրջայցի ընթացքում հետաքրքրվել դրանց գործունեությամբ, ու, մասնավորապես, ստորգետնյա ջրօգտագործման ծավալներով։ Նախարար Սուրեն Պապիկյանը ծանոթացել է նաև ԱՄՆ ՄԶԳ-ի կողմից Արարատյան դաշտի ոռոգման ջրի սակավության խնդրի լուծմանն ուղղված ծրագրին, որի իրականացման արդյունքում մի շարք ձկնաբուծարաններում ներդրված տեխնոլոգիաները թույլ կտան օգտագործված ջուրը ֆիլտրացիայից հետո ուղղել ոռոգելի դաշտեր՝ ապահովելով հողատարածքների անխափան ոռոգումը և լուծելով ստորերկրյա ջրերի արդյունավետ օգտագործման խնդիրը։
