Ռուսաստանը կարող է հայտնվել մարդասիրական ճգնաժամի եզրին. հարյուր հազարավոր ուկրաինացիներ լքում են իրենց երկիրը՝ վախենալով հեղափոխությունից: Այս մասին գրում է Forbes-ը:
Ռուսաստանի սահմանային ծառայության տվյալներով՝ վերջին երկու ամիսներին 675 հազար ուկրաինացի Ռուսաստան է ուղևորվել: Դրան զուգահեռ՝ քաղաքական ճգնաժամը շարունակում է բարդացնել իրավիճակը 45.5 մլն բնակչություն ունեցող երկրում:
Փախստականների հարցերով ՄԱԿ-ի գերագույն հանձնակատարի գրասենյակի տվյալներով՝ 2012 թվականին հակամարտությունների ու հետապնդումների հետևանքով 7.6 մլն մարդ ստիպված է եղել պաշտպանություն փնտրել այլ վայրերում: 2012-ի ընթացքում օրական իր տունն է լքել միջինը 23 հազար մարդ: Համեմատության համար՝ վերջին երկու ամիսներին օրական Ուկրաինան լքել է ավելի քան 11 հազար մարդ:
Զանգվածային միգրացիան կարող է լուրջ բեռ դառնալ Ռուսաստանի համար՝ նշում է պարբերականը: Ներկայումս Ռուսաստանում կա 3200 փախստական և «առանց քաղաքացիության» 178 հազար անձ:
Ռուսաստանում նաև բնակվում է 9900 ներքին տեղահանված, որոնց մեծ մասը լքել են իրենց տները Չեչնիայում և Հարավային Օսիայում հակամարտությունների հետևանքով:
