Վրաստանում Թուրքիայի դեսպանատունը՝ դեսպան Ֆաթմա Ջերեն Յազգանի անունից, մամուլի հաղորդագրություն է տարածել։ Այն ներկայացրել է Վրաստանի հայալեզու «Ալիք մեդիա»-ն:
Հաղորդագրությունում ասվում է, որ 2019-ի ապրիլի 24-ին մի խումբ հայեր այս տարի ևս դեսպանատան առջև ցույց անցկացրեցին՝ Թուրքիայի կառավարությունից պահանջելով 1915-ի դեպքերը որպես ցեղասպանություն ճանաչել: Ընդգծվում է նաև, որ հայերը՝ ինչպես սփյուռքում, այնպես էլ իրենց հայրենիքում, երգերում, ելույթներում և կարգախոսներում սպառնում են Թուրքիայի տարածքային ամբողջականությանն ու վիրավորում Թուրքիայի Հանրապետության հիմնադիր Մուստաֆա Քեմալ Աթաթուրքին:
Միևնույն օրը երեխաների պաշտպանության միջազգային օրվա կապակցությամբ Թուրքիայի դեսպանատունը միջոցառում է կազմակերպել, որտեղ հնչել են տարբեր լեզուներով երգեր,
Դեսպանի խոսքով՝ այսպիսով ընդգծվել է, որ տարածաշրջանի յուրաքանչյուր երեխա խաղաղ ապագայի իրավունք ունի։
Անդրադառնալով Հրանտ Դինքի սպանությանը՝ դեսպանն ասել է, որ նրան սպանեցին այնպես, ինչպես 1973-1984-ին ԱՍԱԼԱ-ն ԱՄՆ-ում և եվրոպական մի շարք քաղաքներում սպանեց թուրք դիվանագետներին։
Իսկ ինչ վերաբերում է 1915-ի իրադարձություններին, ապա դեսպանը նշում է, որ դա ոչ թե ցեղասպանություն էր, այլ տեղահանություն, որը հազարավոր մահերի պատճառ է դարձել։ Եվ այդ զոհերի հիշատակը չպետք է մոռացվի։