Նախկին գլխավոր դատախազ Գևորգ Կոստանյանը վերջերս հայտարարել է՝ քանի որ այժմ նա պետական պաշտոնյա չէ, որոշել է զբաղվել 1915 թվականի Հայոց ցեղասպանության հետևանքով տուժած քաղաքացիների իրավահաջորդների ոտնահարված իրավունքների վերականգնման հարցով։ Ինչի՞ մասին է խոսքը «Առաջին լրատվական»-ի հարցին նախկին գլխավոր դատախազ Գևորգ Կոստանյանը պատասխանեց․ «Նախ, խնդիրն այն է, որ ես լինելով պետական պաշտոնյա, իրավասու չէի նման գործունեություն իրականացնել։ Ինչո՞ւ։ Որովհետև, եթե այս հայցի մեջ որևէ կերպ պետությունը ներգրավված լինի, ապա, անկախ նրանից՝ հայցը հիմնավոր է, թե ոչ, միանգամից կմերժվի։ Այսինքն՝ պետական պաշտոն զբաղեցնելու պայմաններում ուղղակի անհնար էր և անթույլատրելի, որ ոչ միայն ես, այլև որևէ մեկը զբաղվեր այս հարցով»։
Գևորգ Կոստանյանը նաև հավելեց․ «Ինչ վերաբերում է բովանդակային կողմին, այո, նման մտադրություն ունեմ։ Ես հայտարարել եմ, որ մենք ունենալով բավարար իրավական հենք և հիմք, որպեսզի Հայոց ցեղասպանության հետևանքով տուժած քաղաքացիների իրավահաջորդների ոտնահարված իրավունքները պաշտպանենք, դրա համար նախաձեռնել ենք այս գործընթացը։ Ընդ որում՝ սա ոչ միայն իրավական կոնտեքստ ունի իր մեջ, այլ նաև բարոյական, որովհետև 104 տարի արդեն անցել է, բայց գոնե Ցեղասպանության հետևանքով ֆիզիկապես ոչնչացված մարդկանց իրավունքները, այնուամենայնիվ, ինչքան էլ ժամանակ անցնի, ենթակա են վերականգնման»։
Դուք միայնա՞կ եք պատրաստվում զբաղվել այս հարցով, թե՞ կա թիմ, որն օգնելու է Ձեզ այս հարցում «Առաջին լրատվական»-ի հարցին նախկին գլխավոր դատախազը պատասխանեց, որ միայնակ հնարավոր չէ սրանով զբաղվել, որովհետև սա բավականին ծավալուն աշխատանք է։
Մանրամասները՝ տեսանյութում։
