«Մենք անկախ, սուվերեն պետություն ենք, և աշխարհում չկա որևէ պետություն, որն իրավունք ունի մեզ վրա զայրույթ թափելու»,- «Առաջին լրատվական»-ի հետ զրույցում ասաց ԱԺ արտաքին հարաբերությունների հանձնաժողովի նախագահ Ռուբեն Ռուբինյանը՝ անդրադառնալով հայտնի հարցազրույցում ԱՄՆ-ին առնչվող վարչապետ Նիկոլ Փաշինյանի արտահայտությանը:
Պարզաբանելով՝ Ռուբեն Ռուբինյանը նկատեց. «Այդ միտքը արտահայտվել է հետևյալ համատեքստում. Հայաստանը անկախ պետություն է և որևէ խնդիր չունի բաց ու անկաշկանդ խոսելու բոլոր գործընկեր և ոչ գործընկեր պետությունների հետ՝ ներառյալ դաշնակից պետությունները և Արևմուտքը»:
Մեր զրուցակիցը չի կարծում, որ վարչապետի այդ հայտարարությունը կբարդացնի ՀՀ-Արևմուտք հարաբերությունները. «Վարչապետը տարբեր մտքեր է արտահայտել տարբեր երկրների հետ կապված»:
Ինչ վերաբերում է այն տեսակետներին, որ վարչապետի հայտարարությունը Ռուսաստանին սիրաշահելու փորձ էր, Ռուբինյանն ասաց. «Մենք ոչ մի պետության սիրաշահելու խնդիր չունենք: Մենք գործընկեր պետությունների հետ բաց և առանց կաշկանդվելու խոսում ենք այն խնդիրների մասին, որոնք տեսնում ենք, բարձրաձայնում ենք մեր մտահոգությունները, եթե դրանք լինում են: Եվ մեզ համար բացարձակ կապ չունի, թե որ բարեկամ պետության հետ ենք մենք խոսում»:
Նա հավելեց, որ հայկական մամուլում շատ հաճախ առաջ են քաշվում ոչ այնքան տրամաբանական տեսակետներ, որոնք նաև կարելի է անվանել կեղծ օրակարգեր:
Առավել մանրամասն՝ տեսանյութում:
