Հեղափոխությունից հետո անցել է մեկ տարի, տարբեր գնահատկաններ են հնչում տեղի ունեցած իրադարձությունների վերաբերյալ, մեծամասնության ցանկությունն է արդյունքներ գրանցել և շահեկանորեն դուրս գալ ստեղծված իրավիճակից: Ընթացիկ զարգացումների շուրջ «Առաջին լրատվական»- ի հետ զրույցում պատմաբան Վահրամ Թոքմաջյանը նշեց, որ մի քանի կարևոր հանգամանքեր կան, որոնց առկայության դեպքում Նիկոլ Փաշինյանը և նրա իշխանությունը կարող է հաջողություններ գրանցել:
«Հասարակությունը երկար տարիներ թմբիրի մեջ էր, ունեցավ տարատեսակ առկայծումներ ու փայլատակումներ, չհաջողեց, «կացինը» հաղթեց և որոշ ժամանակով հասարակության մեջքը կոտրեց. հասարակության լայն շերտերը հայտնվել էին մարգինալ վիճակում, վաղվա օրվա նկատմամբ հույս չկար, ապրում էինք մեխանիկորեն:
Եղան անցյալ տարվա ապրիլ-մայիսյան իրադարձությունները, դուրս եկանք փողոց՝ ինչ-որ բան փոխելու: Այն խեղդվածությունը, որ կար, իր դիրքերը զիջեց, մարդիկ սկսեցին շնչել: Այս առումով հավատ արթնացավ գալիք օրվա նկատմամբ… Փաշինյանի կերպարի մեջ հասարակությունը դրել է Թրիքսթերի կերպարը՝ դրական իմաստով, որը պետք է «ջարդի» յուրաքանչյուր հինը՝ բերելով նորը, որպեսզի հասարակությունը չվերադառնա նախկին շրջափուլ, նախկին թմբիր…»:
Պատմաբանի խոսքով՝ շատ կարևոր է, որ հեղափոխությունը կայանա. հեղափոխությունից անցել է մեկ տարի, բայց հեղափոխությունը դեռ չի կայացել:
«Հին էլիտաներն իրենց սպառել են, չունենք ձևավորված նոր էլիտա. ունենք շարժում՝ հեղափոխություն, որը եղավ ներքևից: Մեզ անհրաժշտ է նաև հեղափոխություն վերևից. այսինքն՝ նոր արժեքներ և նոր մշակույթ պետք է «պարտադրել»: Այսինքն՝ երբ որ կբերենք նոր տեսքի և կհստակեցնենք, թե համակեցության ինչ դաշտում ենք ապրելու և աշխատելու, արդեն հասկանալի կլինեն այն ուղերձները, որ գալիս են վերևից՝ դա տնտեսական նոր կացութաձևն է, սոցիալական հարաբերությունների նոր բնույթն է և դա ի վերջո հանգեցնում է մարդկային հարաբերությունների որակապես նոր բնույթի: Մեր միջից հանել է պետք գողապետական, կուլակային մտածելակերպը և խոսույթը, այլապես, եթե մնանք այդ մտածողությամբ, չենք հաջողի: Մենք ունենք հաջողությունների հասնելու պոտենցիալը»,- նշեց Վ. Թոքմաջյանը:
Մանրամասն՝ տեսանյութում:
