Ադրբեջանը հայտարարում է, որ իր և Եվրամիության միջև ռազմավարական գործընկերության մասին նոր համաձայնագիրը կստորագրվի մայիսի 13-ին։ Այդ օրերին Բրյուսելում տեղի է ունենալու Արևելյան գործընկերության 10-ամյակին նվիրված բարձր կոնֆերանս, որին մասնակցելու են ԵՄ և ԱլԳ երկրների ղեկավարները, այդ թվում՝ Հայաստանը։ Ազգային ժողովի արտաքին հարաբերությունների մշտական հանձնաժողովի նախկին նախագահ Արմեն Աշոտյանն այս առիթով իր մտահոգությունն է հայտնել ՀՀ ԱԳՆ-ին հարցեր ուղղելու տեսքով՝ արդյո՞ք Հայաստանի ԱԳՆ-ն հետևում է ԵՄ-Ադրբեջան նոր համաձայնագրի նախապատրաստման աշխատանքներին, արդյո՞ք այդ համաձայնագրում Արցախին վերաբերող ձևակերպումները բավարարում են Հայաստանին և համադրելի են ԵՄ-Հայաստան համաձայնագրում ամրագրված դրույթների հետ: Աշոտյանն իր գրառման մեջ նշում է, որ ամիսներ շարունակ այս հարցերը բարձրացրել, բայց պատասխան չի ստացել։
Մարդկային զարգացման միջազգային կենտրոնի նախագահ Թևան Պողոսյանը նշեց, որ թեպետ ստորագրման մասին վերջնական ինֆորմացիա տարածված չէ՝ Հայաստանին չպետք է շատ մտահոգի, թե փաստաթուղթը կոնկրետ երբ է ստորագրվելու, կարևոր է դրա բովանդակությունը։ «Մենք գիտենք, որ կա Եվրամիություն-Ադրբեջան համագործակցության գործընթաց։ Մենք էլ էինք բանակցում Եվրամիության հետ ու հասել էինք նրան, որ պետք է Ասոցացման համաձայնագիր ստորագրեինք, հետո ձևավորվեց քաղաքական մի այնպիսի իրավիճակ, որ մենք ստիպված եղանք փոխել մեր կարծիքն ու այլ փաստաթղթի շուրջ բանակցել։ Այժմ կարևոր է ֆիքսել, որ կա գործընթաց, որին մենք պետք է ուշադիր հետևենք ու պահանջատեր լինելենք, որ Եվրամիություն-Ադրբեջան ստորագրվելիք փաստաթղթի մեջ Արցախի հարցի հետ կապված ձևակերպումները չհակասեն Եվրամիության այն դիրքորոշմանը, որը ամրագրված է Հայաստան-ԵՄ Համապարփակ և ընդլայնված գործընկերության համաձայնագրում»,-«Առաջին լրատվական»-ի հետ զրույցում ասաց նա։
Հարցին՝ արդյոք կա՞ ՀՀ ԱԳՆ-ի կողմից տեղեկատվություն մատուցելու պակաս, մեր զրուցակիցն ասաց. «Գուցե իրենք ունեն ներքին ինֆորմացիա, բայց հանրությունը տեղեկություն չունի և իրավունք ունի իր մտահոգությունը հայտնել։ Շատ քաղաքական ուժեր, որոնք անդամակցում են տարբեր եվրոպական քաղաքական ընտանիքներին, գուցե ներքին տեղեկություններ են ստանում, որ կա գործընթաց, որում խնդիրներ կան։ Եթե նրանք այդ մասին բարձրաձայնում են՝ դրա համար պետք է շնորհակալություն հայտնենք։ Նույն արտաքին գործերի նախարարությունը կարող է շատ հանգիստ ասել, որ իրենք ունեցել են այսպիսի տեղեկություններ։ Պետք է բացահայտ Եվրամիության առջև պահանջ դնենք, որ իրենք չեն գնա այնպիսի քայլերի, որոնք կվնասեն Եվրամիություն-Հայաստան հարաբերություններին»։
Թևան Պողոսյանը շեշտեց. «Եվրամիությունն ու Ադրբեջանն ունեն իրենց շահերը և համագործակցում են։ Անկախ նրանից՝ այդ թուղթը կլինի, թե ոչ, Եվրամիությունը մեկ անգամ չէ, որ ասել է, որ Ադրբեջանն իր ռազմավարական գործընկերն է՝ առնվազն էներգետիկ անվտանգությունը Եվրամիությանն օժանդակելու և նպաստելու հարցում։ Մենք կարո՞ղ ենք այլ առաջարկ անել Եվրամիությանը, որ ինքը Ադրբեջանի հետ ընդհանրապես չշփվի, գուցե՝ ոչ։ Բայց կարող ենք ժողովրդավարությունն իբրև գործիք օգտագործել։ Պետք է հասկանանք, որ մենք մեր շահերը պետք է պաշտպանենք ու ստեղծենք այնպիսի միջավայր, որ մեր շահերին վնասներ չհասցվեն։ Այնպես չէ, որ իրենց հարաբերությունները նոր են սկսվել, մենք պետք է հասկանանք՝ ինչ ենք անելու, որ դրանք ապագայում մեր շահերին վնասներ չհասցնեն»։
