Դանիայի սննդամթերք արտադրող մի քանի ընկերություններ անհայտ փոշի պարունակող նամակներ են ստացել, հաղորդում է Associated Press-ը:
Ոստիկանության տվյալներով, նամակներն ուղարկվել են Բելգիայից և «վտանգավոր նյութ» են պարունակում: Այլ տեղեկություններ ոստիկանությունը չի տրամադրել, նշելով, որ հետաքննություն է ընթանում:
Միևնույն ժամանակ, Դանիայի լրատվամիջոցները հաղորդել են, որ նամակում 30 000 եվրոյի պահանջ է ներկայացվում՝ ընկերության արտադրանքի թունավորման սպառնալիքով:
Մասնավորապես, Եվրոպայում մսամթերք արտադրող խոշորագույն դանիական ընկերությունը հաստատել է, որ այդպիսի նամակ է ստացել: Ընկերությունն ասել է, որ ո՛չ աշխատակիցներին, ո՛չ էլ սպառողներին վտանգ չի սպառնում:
Նշվում է նաև, որ նման նամակներ ուղարկվել են եվրոպական այլ երկրներում մի քանի սննդամթերքի արտադրությամբ զբաղվող ընկերությունների:
