Gazeta.ru-ի փոխանցմամբ՝ Թբիլիսիում գտնվող ընդդիմադիր «Վրացական» կուսակցության կենտրոնական գրասենյակը երկուշաբթի երեկոյան խուզարկվել է ոստիկանների կողմից։
Վերջիններս հայտարարել են, թե, իրենց օպերատիվ տվյալներով, այդտեղ է թաքնվում կուսակցության առաջնորդներից, նախկին պաշտպանության նախարար Իրակլի Օքրուաշվիլիի քեռի Զուրաբ Գիգուաշվիլին։
Ընդդիմադիր կուսակցության գրասենյակ այցելած ոստիկանների թիվը հասել է 150-ի։ Խուզարկության ավարտից և Գիգուաշվիլիին չհայտնաբերելուց հետո նրանք լքել են գրասենյակը։
Դրանից հետո «Վրացական» կուսակցությունը դիմել է իր գործընկերներին՝ կոչ անելով միավորվել և կանխել ընդդիմադիրների հալածանքները։ Բացի այդ, նա հայտարարել է, որ Amnesty International միջազգային իրավապաշտպան կազմակերպությունը պետք է իր դիրքորոշումը հայտնի Վրաստանի նկատմամբ։
Հիշեցնենք, որ ավելի վաղ News Georgia-ն հայտնել էր, թե Զուրաբ Գիգուաշվիլին ձերբակալվել է հայ-վրացական սահմանը հատելու փորձ անելիս։
Ներկա դրությամբ ձերբակալված են «Վրացական» կուսակցության 25 ներկայացուցիչներ։