Լեոնարդո դա Վինչիի կորսված համարվող «Աշխարհի փրկիչը» կտավը հայտնաբերվել է: Այս մասին գրում է ARTnews կայքը: Կտավի իսկությունը հաստատել են աշխարհի երկու խոշորագույն փորձագետներ Նյու Յորքի Մետրոպոլիտեն և Լոնդոնի Ազգային պատկերասրահից:
Այս նկարը պատկանում է արվեստի գործերի վաճառքով զբաղվող մի խումբ մարդկանց, որոնք այն գնել էին 2000-ականների սկզբին ԱՄՆ-ում կայացած աճուրդներից մեկում: Նրանցից մեկը՝ Ռոբերտ Սայմոնը, ասում է, որ նկարը մինչ այժմ կրկնօրինակ էր համարվում, քանի որ բնօրինակի վրա բազմաթիվ շերտեր կան, այսինքն՝ ինչ-որ բաներ այլ նկարիչների կողմից ավելացվել էին: Սակայն մի քանի նորոգումներից հետո, երբ հանվել էին այդ լրացուցիչ շերտերը, պարզվել է, որ դա Լեոնարդոյի ձեռքի գործն է:
Նկարը երկու տարի առաջ ուսումնասիրած մասնագետներից մեկն ասել է, որ թեև նորոգումներից հետո կտավը կորցրել է գույները, սակայն այն «հեքիաթային տպավորություն է թողնում»: Նկարի սեփականատերերը հրաժարվել են հայտարարել կտավի գնի մասին, սակայն, ըստ որոշ աղբյուրների, նրանք դրա համար ցանկանում են ստանալ մոտ 200 միլիոն դոլար: