Վրաստանի ՆԳՆ հատուկ նշանակության ստորաբաժանումները լքել են Պանկիսի կիրճը, որտեղ ապրիլի 21-ին ուժայինների և Ալազան գետի վրա փոքր ՀԷԿ-ի կառուցման դեմ բողոքող տեղի բնակչության միջև բախումներ են տեղի ունեցել, հաղորդում է «Ինտերֆաքսը»:
Ցուցարարների մեծ մասը ցրվել է, սակայն կիրճում ոստիկանության ուժեղացված ստորաբաժանումներ են մնացել, նշում է գործակալությունը:
Ինչպես հաղորդում է Sputnik-ը, Վրաստանի ՆԳՆ ղեկավար Գեորգի Գախարիան հայտարարել է, որ ՀԷԿ-ի շինարարությունը կվերսկսվի միայն բնակչության 90 տոկոսի համաձայնության դեպքում: Իշխանությունները կշարունակեն երկխոսությունը քաղաքացիների հետ, սակայն նրանք, ովքեր ուժ են գործադրել իրավապահների դեմ, կպատժվեն»,- ընդգծել է նախարարը: Միևնույն ժամանակ, իշխանությունները հայտարարել են, որ անհրաժեշտության դեպքում պատրաստ են կոշտ միջոցներ ձեռնարկել:
Ըստ «Ինտերֆաքսի» հաղորդած վերջին տվյալների, Պանկիսի կիրճում բախումների արդյունքում 50 մարդ է տուժել, հիմնականում իրավապահ մարմինների աշխատակիցներ: Այրվել են ոստիկանական մի քանի ավտոմեքենա և ՀԷԿ-ի շինարարության էքսկավատորը:
Վրաստանի նախագահ Սալոմե Զուրաբիշվիլին Facebook-ում հաղորդել է, որ հետևում է կիրճում ծավալվող իրադարձություններին: Երկրի ղեկավարը պատրաստակամություն է հայտնել միանալու իրավիճակի կարգավորմանը:
Պանկիսի կիրճի բնակիչները, հիմնականում, էթնիկ չեչենները, կտրականապես դեմ են Ալազան գետի վրա «Խադորի-3» ՀԷԿ-ի կառուցմանը: Ապրիլի 21-ին մեկնարկած շինարարական աշխատանքները նրանք բողոքի ակցիաներով են դիմավորել, իսկ երբ ինքնաբուխ ակցիաները ցրելու համար ուժայիններ են ներգրավվել, նրանք սկսել են քարեր նետել նրանց ուղղությամբ և այրել նրանց մեքենաները:
2018-ի մարտից «Խադորի-3» ՀԷԿ-ի շինարարությունը բազմիցս հետաձգվել է Վրաստանի իշխանությունների կողմից՝ տեղի բնակչության բողոքի պատճառով, որոնք մտահոգված են ՀԷԿ-ի՝ շրջակա միջավայրի վրա հնարավոր բացասական ազդեցությունից: