Ապրիլի 15-ին Մոսկվայում կայացավ Հայաստանի, Ադրբեջանի և Ռուսաստանի արտգործնախարարների, ինչպես նաև ԵԱՀԿ Մինսկի խմբի համանախագահների մասնակցությամբ հանդիպումը։ «Կոմերսանտ» պարբերականն այս հանդիպմանն անդրադարձ անելով՝ նշել է, որ Լեռնային Ղարաբաղի հակամարտության կարգավորման հարցում տևական ժամանակահատվածի ընթացքում առաջին անգամ դրական տեղաշարժ է արձանագրվել։ Այդպե՞ս է արդյոք «Առաջին լրատվական»-ի հարցին քաղաքական գիտությունների թեկնածու, դոցենտ Նարեկ Գալստյանը պատասխանեց․ «Պարբերաբար այդպիսի հայտարարություններ հնչում են։ Եթե ոչ ամեն տարի, ապա գոնե երկու տարին մեկ հայտարարում են, որ որոշակի առաջընթաց կա։ Սակայն իրականում բուն հիմնախնդրի կարգավորման գործում դժվար է ասել՝ զինադադարի համաձայնագրի կնքումից հետո լուրջ տեղաշարժ եղել է։ Պայմանավորվածություններ եղել են, եղել են նաև շատ հետաքրքիր հայտարարություններ, բայց իրականում՝ գործնական տեսանկյունից առաջընթաց չի եղել։ Ինչ վերաբերում է կոնկրետ վերջին հանդիպման ժամանակ ձեռք բերված համաձայնություններին, ապա դրանք առավելապես հումանիտար ոլորտին են վերաբերում, և ուղղակիորեն չեն վերաբերում հիմնախնդրի կարգավորմանը։ Այս տեսանկյունից կարելի է համարել լավ քայլ, բայց որ սա որոշիչ է և լուրջ առաջընթաց է հիմնախնդրի կարգավորման բուն ուղղությամբ՝ համամիտ չեմ»։
«Սա առաջին դեպքը չէ, որ Ռուսաստանն է նախաձեռնում նման հանդիպում։ Մի քանի տարի առաջ ևս բավական տևական ժամանակ հանդիպումների հիմնական նախաձեռնողը Ռուսաստանն էր։ Այնպես որ, սա ինչ-որ արտառոց բան չէ։ Պետք է հաշվի առնենք նաև, որ Ռուսաստանը համանախագահող երկրներից միակն է, որ էական ազդեցություն ունի երկու երկրների վրա։ Այսինքն՝ այս տեսանկյունից տրամաբանական է, որ Ռուսաստանը որոշում է տեղից շարժել բանակցային պրոցեսը»,- հավելեց բանախոսը։
Մանրամասները՝ տեսանյութում։
