ՀՀԿ խմբակցության ղեկավար Գալուստ Սահակյանը փետրվարի 28-ին՝ ԱԺ ճեպազրույցների ժամին, անդրադարձավ նախօրեին խորհրդարանում Մարտի 1-ի հարցերն ուսումնասիրող ժամանակավոր հանձնաժողով ստեղծելու ՀԱԿ առաջարկի քննարկման ժամանակ պատգամավոր Արամ Մանուկյանի հայտարարությանը: ՀԱԿ պատգամավորը հայտարարել էր, որ եթե Լևոն Տեր-Պետրոսյանի մեղքը մարտիմեկյան դեպքերում կա, եթե կան փաստեր, ապա ինչու չեն դատում նրան:
«Գնացեք, Լևոն Տեր-Պետրոսյանին դատեք, ո՞վ ա խանգարում, մուրճն էլ ա ձեր ձեռքին, մեխն էլ, գնացեք, արեք, ի՞նչն ա խանգարում, ինչո՞ւ չեք անում»,- ասել էր նա, ինչին հետևել էր ԱԺ նախագահի արձագանքը, թե՝ իրենք հարգում են առաջին նախագահին, պետք չէ նման խորհուրդներ տալ:
ՀՀԿ խմբակցության ղեկավարն իր հերթին արձագանքեց՝ նշելով, որ Արամ Մանուկյանը նման բան հայտարարելով՝ ինքնամեծարմամբ է զբաղված: Լրագրողները հետաքրքրվեցին՝ անհրաժեշտության դեպքում ՀՀ երկրորդ և երրորդ նախագահներն էլ հարցաքննության կենթարկվե՞ն, Տեր-Պետրոսյանի պես կվարվե՞ն, Սահակյանը նախ նշեց, որ այդ «միտինգները» Ռոբերտ Քոչարյանն ու Սերժ Սարգսյանը չէին կազմակերպել, որ այդ բովանդակությամբ հարցաքննության կանչվեն: «Երբ Արամ Մանուկյանը ասում է՝ տարեք, Լևոն Տեր-Պետրոսյանին հարցաքննեք, ես իմ ու մեր ազգի կողմից շատ վիրավորվում եմ. չի կարելի ցինիզմը այնտեղ հասցնել, որ իբր թե այնքան կամ, որ նույնիսկ ապահովում եմ Լևոն Տեր-Պետրոսյանին: Միշտ հիշեք՝ նախագահական ինստիտուտը ինստիտուտ է, Տեր-Պետրոսյանն էլ մեր առաջին նախագահն է, ոչ թե Արամի ձեռի թաշկինակը, որ բերի կամ տանի: Լևոն Տեր-Պետրոսյանը ինքը կորոշի նման իրավիճակում ինչպես իրեն պահի»,- ասաց նա:
Լուսանկարը՝ Photolure-ի
