Օքսֆորդի համալսարանի հետազոտողները պարզել են, որ կարմիր (տավարի, խոզի, գառի) և վերամշակված մսի օրական օգտագործումը, նույնիսկ փոքր քանակությամբ, կարող է մեծացնել կոլոռեկտալ քաղցկեղի զարգացման հավանականությունը:
Գիտական աշխատանքի արդյունքները հրապարակվել են International Journal of Epidemiology ամսագրում:
Ուսումնասիրությունն իրականացվել է վեց տարվա ընթացքում: Դրա համար փորձագետները 500 հազար հիվանդների տվյալներ են հավաքել: Աղիների քաղցկեղի 2609 դեպքեր են արձանագրվել նրանց մոտ, ովքեր գիտական աշխատանքի մեկնարկի պահին եղել են 40-69 տարեկան:
Հետազոտությունների արդյունքում պարզվել է, որ ուռուցքային հիվանդությունների առաջացման ռիսկը մոտավորապես 76 գրամ կարմիր և վերամշակված միս օգտագործողների մոտ 20%-ով ավելի մեծ է եղել, քան նրանց, ովքեր կերել են 21 գրամ կամ ավելի պակաս:
Բացի այդ, ռիսկը 15%-ով բարձր է եղել նրանց համար, ովքեր օրական 54 գրամ կարմիր միս են կերել, համեմատած ութ գրամ միս օգտագործողների հետ:
