Երևանում օրեցօր սրվում է աղբահանության խնդիրը. մայրաքաղաքի աղբահանության թեման ամենաքննարկվողներից է. մի կողմից՝ քաղաքային իշխանությունը մեղադրում է «Սանիթեք» ընկերությանը՝ պարտականությունները պատշաճ չկատարելու մեջ, մյուս կողմից՝ «Սանիթեքն» է մեղադրում քաղաքապետարանին, և խնդիրն այդպես էլ չի լուծվում:
Մայրաքաղաքի խնդիրների շուրջ «Առաջին լրատվական»-ը զրուցեց Երևանի ավագանու «Իմ քայլը» դաշինքի ներկայացուցիչ Լևոն Հովհաննիսյանի, «Լույս» դաշինքի ներկայացուցիչներ Թեհմինա Վարդանյանի և Դավիթ Խաժակյանի հետ:
Այսօր կառավարությունը հաստատեց նախագիծը, որով քաղաքապետարանը 15 նոր աղբատար մեքենա ձեռք կբերի: Անդրադառնալով այս դիտարկմանը՝ Դավիթ Խաժակյանն ընդգծեց, որ իրենց համոզմամբ՝ քաղաքապետարանը որոշել է շրջանցիկ ճանապարհներ փնտրել ոչ թե խնդիրը լուծելու, այլ իրականացնելու մեկ անձից հրատապ գնում կատարելը. «Վիճակը, որ այսօր կա՝ կապված աղբահանության հետ, շատ կանխատեսելի էր, և քաղաքապետարանը կարող էր հազար ու մի այլ միջոցով՝ օրինական ճանապարհով այդ գնումն իրականացնել, բայց դիմում է անօրինական քայլի, որով, ըստ էության, անտեսում է գնումների բողոքարկման խորհրդի որոշումը, ինչպես նաև դատարանի քննության ընթացքը և փաստացի դիմում է մեկ անձից գնում կատարելու՝ առանց կաշկանդվելու մրցութային պայմաններով գնումով: Այս առումով դանակը հասել է ոսկորին: Այս գնումն օրինական չէ, և ուշ թե շուտ այդ որոշումը կայացնող պաշտոնյաները պետք է պատասխան տան»:
«Ընդ որում՝ այս ամենը կազմակերպվել է մեկ գիշերվա ընթացքում,- հավելեց Թեհմինա Վարդանյանը: -Ո՞ւմ աչքերն է կապում քաղաքային իշխանությունը»:
Լևոն Հովհաննիսյանի խոսքով՝ օր առաջ անհրաժեշտություն կա լուծել Երևան քաղաքի աղբահանության հարցը, և քանի որ այս պահին «Սանիթեք» ընկերությունն իրեն պատկանող գույքով, մեքենաներով, չի կարողանում պատշաճ մակարդակով իրականացնել աղբահանություն, հաշվի առնելով նաև այն, որ եղանակի տաքացմանը զուգընթաց աղբահանության հարցն ավելի է սրվելու՝ քաղաքապետարանը որոշել է իր միջոցներով գնում կատարել՝ հարցին հրատապ լուծում տալու և աղբահանության խնդիրը հնարավորինս կարգավորելու համար։
Մանրամասն՝ տեսանյութում:
