«Ես անդրադառնամ այս հարցի ակունքներին։ Հիշեցնեմ հանձնաժողովի քննարկումը, պարզապես Սասուն Միքայելյանին չեն հասկացել, թե ինչ էր ասում կամ չեն ուզեցել հասկանալ։ Սասուն Միքայելյանը հնչեցրել է մի բան, որ մենք մեր թերացումները շատ արագ պետք է լուծենք, բայց այդ պրոբլեմի խորքային լուծման քննարկումը ունեցել ենք հանձնաժողովում, երբ բերել են մի նախագիծ, որի արդյունքում մեր առաջնագծի ամբողջ կառուցվածքը մի մասով մնում էր անպաշտպան։ Այդ նախագիծը պետք է ունենա լուրջ վերլուծություն։ Պետք չէր անմիջապես փորձել հերքել Սասուն Միքայելյանին»,-«Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր, ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով Սասուն Միքայելյանի հայտարարությանը, որ մեր զինվորներն առաջին գիծը հազիվ են պահում ու գրեթե չեն հերիքում։
Հիշեցնենք, որ ԲՀԿ-ական մի խումբ պատգամավորների կողմից մշակված «Զինվորական ծառայության և զինծառայողի կարգավիճակի մասին» ՀՀ օրենքում լրացում կատարելու մասին նախաձեռնությունը մերժվեց խորհրդարանական մեծամասնության կողմից։ Այս նախագծի քննարկման ժամանակ էր Սասուն Միքայելյանը նման հայտարարությամբ հանդես եկել։
«Հանձնաժողովում մենք ասում ենք, որ բերեք ամբողջական փաթեթը, և պաշտպանության հարցում որևէ պոպուլիզիմի դրսևորում մոռացեք, մեր հանձնաժողովը դա թույլ չի տա»,-հավելեց Անդրանիկ Քոչարյանը։
Անդրադառնալով հարցին, որ ընդդիմությունը քննադատում է իշխանությանը կադրային հարցում՝ նա նշեց, որ կադրային խնդիր աշխարհի բոլոր երկրներն էլ ունեն կադրային խնդիր․«Մենք աշխատում ենք կադրային բանկ ստեղծելու ուղղությամբ։
99թվականին ինքս զբաղվել եմ այդ բանկի ստեղծմամբ և հպարտությամբ կարող եմ ասել, որ այդ բանկի կարևոր դրսևորումը ունեցել ենք բանակում, երբ մենք ունեցել ենք զինվորականության կադրային բանկ, որը հնարավորությունները օգտագործել ենք ԶՈՒ կադրային նշանակումների պարագայում»,-հավելեց Անդրանիկ Քոչարյանը։
