Թուրքիան C-400 ռուսական զենիթահրթիռային համակարգի օգնությամբ կպաշտպանի մայրաքաղաք Անկարան և Ստամբուլը: Այս մասին հայտարարել է ռազմական գերատեսչության ղեկավար Հուլուսի Աքարը, հաղորդում է NTV հեռուստաալիքը:
«Հավանական է Անկարայի և Ստամբուլի պաշտպանությունը կդառնա C-400-ի հիմնական առաքելությունը,- հայտարարել է նախարարը: Նա ընդգծել է, որ ելնելով համապատասխան սպառնալիքներից, Թուրքիան ստիպված է եղել համակարգը գնել Ռուսաստանից: Աքարը հավելել է, որ C-400-ի ձեռքբերումը ամերիկյան F-35 կործանիչների հետ կապելը սխալ որոշում էր:
Ավելի վաղ հաղորդվել էր, որ ԱՄՆ նախագահ Դոնալդ Թրամփը Սպիտակ տանը ընդունել է Թուրքիայի ֆինանսների նախարար Բերաթ Ալբեյրակին և նրա հետ քննարկել Անկարայի կողմից C-400-ի ձեռքբերումը:
Ապրիլի սկզբին Վաշինգթոնը չեղարկել է F-35 կործանիչների սարքավորումների Թուրքիա մատակարարումը՝ ուսական հակաօդային պաշտպանության համակարգերի ձեռքբերման պատճառով: Միացյալ Նահանգները և ՆԱՏՕ-ի անդամ այլ երկրներ մտավախություն ունեն, որ եթե Անկարան զինված լինի և՛ C-400-ով, և՛ F-35-ով, ապա ռուսական համակարգերի ռադարները կսովորեն հայտնաբերել և հետևել ամերիկյան կործանիչներին:
Թուրքիան Ռուսաստանից 4 դիվիզիոն C-400 ՀՕՊ համակարգ է գնել՝ 2.5 միլիարդ դոլարով:
ՌԴ և Թուրքիայի ֆինանսների նախարարությունները ավարտել են նաև գործարքի ֆինանսական կողմի հետ կապված բանակցությունները: 2.5 մլրդ դոլարի 45%-ը Թուրքիան կվճարի իր հաշվին՝ որպես ավանս, իսկ մնացած 55%-ը` Ռուսաստանից ստացած վարկի հաշվին:
Կողմերին մնացել է հաստատել եզրափակիչ փաստաթղթերը: Մատակարարումները կսկսվեն 2019 թ. հոկտեմբերից:
