LVMH (LVMH Moսt Hennessy Louis Vuitton) ընկերությունների խումբը և նրա տնօրենների խորհրդի նախագահ Բեռնար Առնոյի ընտանիքը հայտարարել են Փարիզի Աստվածամոր տաճարի վեականգնմանը 200 մլն եվրո նվիրաբերելու մտադրության մասին: Այդ մասին հայտնել է BFMTV հեռուստաալիքը:
Ավելի վաղ Փարիզի քաղաքագլուխ Անն Իդալգոն հայտարարել է, որ քաղաքապետարանը 50 մլն եվրո կհատկացնի Փարիզի Աստվածամոր տաճարի վերականգնմանը, որը տուժել է հրդեհից: Մինչ այդ Իլ դը Ֆրանս տարածաշրջանի ղեկավար Վալերի Պեկրեսը հայտարարել է, որ տարածաշրջանը, որպես արտակարգ օգնություն, 10 մլն եվրո կհատկացնի Փարիզի Աստվածամոր տաճարի վերականգնմանը: Իր հերթին Ֆրանսիայի Total նավթի-գազի կորպորացիան 100 միլիոն եվրո կտրամադրի կրակի ճարակ դարձած Փարիզի Աստվածամոր տաճարի վերականգնմանը:
«Total-ը, որը Fondation du Patrimoine հիմնադրամի առաջին հովանավորն է երկար տարիների ընթացքում, կկատարի 100 միլիոն եվրոյի չափով հատուկ նվիրատվություն Նոտր Դամ դը Պաղիի վերակառուցման համար»,- գրել է Պույանեն Twitter ցանցի իր օգտահաշվում: Իսկ ֆրանսիացի միլիարդատեր-գործարարներ Պինոների ընտանիքը 100 միլիոն եվրո կտրամադրի Փարիզի Աստվածամոր տաճարի վերականգնմանը, որը տուժել է այնտեղ բռնկած հրդեհի հետևանքով:
Ֆրանսիայի Մշակութային ժառանգության պահպանման պետական հիմնադրամը միջոցների հանգանակություն է սկսել Փարիզի Աստվածամոր տաճարի վերականգնման համար, կազմակերպության կայքում հայտնվել Է «Փրկենք Նոտր Դամը» համապատասխան բաժինը: Օգտատերերին առաջարկվում է կատարել 50-ից մինչեւ 500 եվրո գումարի մուծում. կամ նշել ցանկացած այլ գումար՝ ըստ հայեցողության: «Բոլոր նվիրատվություններն ամբողջությամբ կուղղորդվեն Փարիզի Աստավածամոր տաճարի վերականգնմանը»,- ասված է կայքում հրապարակված մեկնաբանության մեջ։
