«Իրականում այդ դեզինտեգրացիոն գործընթացներն ունեն շատ ավելի խորքային արմատներ և սկսվում են դեռ 2016 թվականից, երբ սկսվեցին ընդհանուր էներգետիկ շուկաների ձևավորման գործընթացները։ Եվ այդ բանակցությունների ընթացքում կողմերը եկան այն սկզբունքային համաձայնության, որ պետք է թերևս հրաժարվել միասնական շուկայի գաղափարից և անցում կատարել ընդհանուր շուկայի գաղափարին, որը լիովին այլ տրամաբանություն է իր մեջ պարունակում։ Ինչ վերաբերում է պաշտոնական Մինսկի կեցվածքին, որ նա դրսևորում է վերջին ամիսների ընթացքում, ապա այստեղ խնդրի նախադրյալը պետք է փնտրենք 2018 թվականի դեկտեմբերին և 2019 թվականի հունվարին ընթացող որոշումների և գործընթացների մեջ, մասնավորապես, խոսքն այն մասին է, որ տվյալ ժամանակահատվածում Մոսկվան կիրառեց, այսպես կոչված, հարկային մանևրը՝ նպատակ հետապնդելով աջակցելու իր նավթավերամշակման ոլորտին։ Սա իրականում ռիսկային գործոններ առաջացրեց Բելառուսի էներգետիկ համակարգի և նավթավերամշակման ոլորտի համար։ Պաշտոնական Մինսկը հայտարարեց, որ այդ ամենի արդյունքում միայն 2019 թվականի ընթացքում շուրջ 300 միլիոն ԱՄՆ դոլարի կորուստներ է կրելու»,- «Առաջին լրատվական»-ի հետ զրույցում ասաց Էներգետիկ անվտանգության ինստիտուտի տնօրեն Վահե Դավթյանը։
«Այսօր ստեղծվել է մի իրավիճակ, որ Մինսկը փորձում է հակադարձել և արդեն հայտարարում է իր տարածքով անցնող «Դրուժբա» նավթամուղի շահագործման մասով որոշակի վերանայումներ անելու վերաբերյալ։ Խոսքը մասնավորապես գնում է այն մասին, որ այդ նավթամուղը պետք է հանձնվի վերանորոգման աշխատանքների։ Ինչը, ըստ էության, նշանակում է, որ ինչ-որ չափով խափանվելու է այդ տարանցիկային գործընթացը, որն իրականացվում է Բելառուսի տարածքով։ Սա, բնականաբար, իր հերթին կարող է հարված հասցնել Ռուսաստանի դիրքերին եվրոպական շուկայում։ Այսօր ստեղծվել է մի այնպիսի իրավիճակ, որ կարող ենք արձանագրել՝ այո, ԵԱՏՄ-ում ընթանում են գործընթացներ, որոնք հակասում են այն ինտեգրացիոն փիլիսոփայությանը, որը որդեգրել էին կողմերը տարիներ առաջ»,- հավելեց բանախոսը։
Մանրամասները՝ տեսանյութում։