Վրաստանի Ազգային բանկը ներկայացրել է ազգային արժույթի լավագույն խորհրդանիշն ընտրելու մրցույթի մասնակիցների ցուցակը: Այս մասին հաղորդում է «Գրուզիա Օնլայն»-ը:
Ժամանակավոր հանձնաժողովը մրցույթին ուղարկած 231 աշխատանքներից ընտրել է 5-ը: Լարիի խորհրդանիշը որոշելու մրցույթի մասին Վրաստանի Ազգային բանկը հայտարարել էր 2013թ. սեպտեմբերի 27-ին:
Մրցույթի կազմակերպիչների խոսքերով՝ լարիի խորհրդանիշի շնորհանդեսը կնպաստի Վրաստանում և դրա սահմաններից դուրս ազգային արժույթի տարածմանը, ինչպես նաև կբարձրացնի լարիի իմիջը հասարակությունում:
Վրաստանի Ազգային բանկի հաղորդագրության համաձայն՝ հանձնաժողովը նախընտրել է հասարակությանը ներգրավել լավագույն աշխատանքի ընտրության ընթացակարգին: Այս նպատակով Ազգային բանկի կայքում անցկացվում է հատուկ քվեարկություն, որը կտևի մինչև մարտի 17-ը: Քվեարկության արդյունքները խորհրդատվական բնույթ կկրեն և կօգնեն հանձնաժողովին վերջնական որոշում ընդունելիս:
