«Ազատություն» ռադիոկայանի փոխանցմամբ՝ Հայաստանի ազգային անվտանգության խորհրդի քարտուղար Արթուր Բաղդասարյանը չորեքշաբթի լրագրողների հետ հանդիպմանն ասել է, որ Ռուսաստանն ըմբռնումով է մոտենում հայ միգրանտների հանդեպ վիզային նոր ռեժիմը բացառության կարգով մեղմացնելու Հայաստանի առաջարկին։
«Խոսքը միայն պաշտոնապես հայտարարված 170 հազար մեր հայրենակիցների դեպորտի մասին չէ, խոսքը նաև այնպիսի դեպքերի մասին, որոնք կան մեր իրականության մեջ, երբ ամուսնուն արդեն իսկ արտաքսել են, ընտանիքը մնացել է այնտեղ։ Շատ նման դեպքեր կան, և սա իսկապես լրջագույն խնդիր է։ Պայմանավորվածություն է ձեռք բերվել ձևավորելու համատեղ միջգերատեսչական աշխատանքային խումբ, որը վաղը արդեն իսկ Մոսկվայում կգումարի իր անդրանիկ նիստը»,- ասել է Բաղդասարյանը։
Բաղդասարյանը վերջերս նամակ էր հղել Ռուսաստանի Դաշնության անվտանգության խորհրդի քարտուղար Նիկոլայ Պատրուշևին՝ խնդրելով Ռուսաստանում աշխատող Հայաստանի քաղաքացիների վերաբերությամբ վերանայել միգրացիոն գործող նորմերը: Ռուսաստանցի գործընկերոջը ուղղված նամակում Բաղդասարյանը նշել էր, որ Հայաստանի տարածքում գտնվող Ռուսաստանի քաղաքացիների նկատմամբ նման սահմանափակումներ չեն կիրառվում և չեն կիրառվելու հետագայում: «Ելնելով սրանից՝ մեր պետությունների քաղաքացիների վերաբերյալ միգրացիոն քաղաքականությունն անհրաժեշտ է մշակել և իրականացնել կողմերի հավասարության հիման վրա»,- ասված է նամակում:
«Ռուսաստանցի մեր գործընկերները հասկանում են խնդրի կարևորությունը մեզ համար, սա վերաբերում է միլիոնավոր մարդկանց։ Այսօր 2.5-3 միլիոն մարդ է բնակվում ՌԴ-ում, եթե մենք չկարողանանք փոխընդունելի լուծումներ գտնել, սա իսկապես շատ լուրջ սոցիալական, տնտեսական, քաղաքական մտահոգություններ է առաջացնում»,- ասել է Անվտանգության խորհրդի քարտուղարը։
Մանրամասները՝ «Ազատություն» ռադիոկայանի կայքէջում:
